POESIA MATHEMATIC
(Millôr Fernandes)

A certe pagina
del libro mathematic
un Quociente se inamorava
un die
follemente
de un Incognita.
Ille la reguardava con su reguardo innumerabile
e la videva, ab apice a base,
un figura impare;
oculos rhomboide, bucca trapezoide,
corpore octagon, sinos spheroide.
Ille faceva del sue
un vita
parallel al de illa
Usque illes se incontrava
in le infinito.
"Qui es tu?" inquireva ille
con anxia radical.
"Io es le summa del quadrato del catetos.
Ma tu pote appellar me Hypotenusa."
E per conversar illes discoperiva que illes era
-- lo que, in arithmetica, corresponde
a animas soror --
primos-inter-se.
E assi illes se amava
al quadrato del velocitate del luce
in un sexte exponentiation
traciante
al voga del momento
e del passion
rectas, curvas, circulos e lineas sinoide.
Illes scandalizava le orthodoxos del formulas euclidian
e le exegetas del universo finite.
Illes rumpeva conventiones newtonian e pitagoric.
E, al fin, decideva maritar se,
constituer un focar.
Plus que un focar,
un perpendicular.
Illes invitava como patrinos
Polyedro e Bisectrice.
E faceva planos, equationes e diagramas pro le futuro
soniante a un felicitate
integral
e differential.
E illes se maritava e habeva un secante e tres cones
multo bellette
e illes era felice
usque ille die
in le qual toto, al fin,
deveni monotonia.
Il era alora que surgeva
Maxime Divisor Comun,
frequentator de circulos concentric
vitiose.
Ille offereva a illa
un magnitude absolute,
e la reduceva a un denominator commun.
Ille, Quociente, notava
que con illa ille non formava plus un toto,
un unitate. Era le triangulo,
tanto appellate amorose.
De ille problema illa era le fraction
le plus ordinarie.
Ma il era alora que Einstein discoperiva le Relativitate
e toto que era expurio deveniva
moralitate,
como, a proposito, in qualcunque
societate.
===================================
Original a <http://www.secrel.com.br/jpoesia/millor07.html>.
Trad.: Ensjo.
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html