Salutes omnilateral,
Io scribe iste message sin ulle ressources referential, e dunque mi *quota
erroral* debe esser plus alte (si, etiam plus alte) que normal. (In plus,
le marcas de citation non functiona correctemente in iste nove computator
mie - multo misteriose.)
On debe absolutemente vender - io vole dicer, *facer comprar* - iste
libres. Io suggere un parve projecto comprendente tres etappas:
(1) Poner le libres ancora *in print*. In cata libreria del mundo anglofone
ha un grandissime libre detra le teke intitulate *Books in Print*, que
liste tote libres anglofone actualmente *in print*. Omne librerias, anque
le plus parve, pote obtener per posta qualcunque libre que se liste hic. Il
ha publicationes similar pro altere linguas, e illos coordina lor effortios
inter se.
Secundo un librario con que io ha discutite iste tema, on debe scriber o
ben telefonar le casa editorial (publishers) R.R. Bowker Co. de New York,
que publica *Books in Print* pro obtener informationes. Il pote haber
tamben certe difficultates. Non tote libres in senso normal es libres in
senso official. Multe libres tecnic, per exemplo, non se liste in *Books in
Print*. Ma io es bastante optimista que ulle obstaculos se lassa superar.
(2) Facer contacto con Amazon.com e altere librerias *online* (il ha
plures, a mi aviso) pro devenir includite in lor catalogos.
(3) Construer un proprie libreria online pro le UMI Servicio de Libres. Io
invisiona un sito de tela independente con un pagina pro cata de cinque o
sex *bestsellers* prospective, como le IED, le Interlingua Grammar,
Interlingua Today, e alteres. Cata de iste paginas velle contener un breve
e interessante description del libre, un lista del contentos, un biographia
del autor, e forsan un o duo graphicas scandite (del copertura, del autor,
de un pagina tipic, qualcunque...). Il serea bon si iste sito era
multilingue: non solo in interlingua, proque nos vole attraher le
interessatos non ancora convincite, e non solo in anglese proque le melior
prospectivos pro interlingua es foras le mundo anglofone.
Multo importante, il velle haber un ligamine a un citation generose ex le
libre - un capitula exemplar, per exemplo.
Il velle haber anque un lista de tote libres disponibile; isto existe
actualmente, io opine.
Le componente le plus difficile velle esser le provision de un medio pro
pagar. A mi aviso, on jam ha facite recercas sur iste tema. Al minus on
poterea acceptar cheques al Interlingua Institute o al Servicio de Libres
e, pro pagamentos per carta bancher, dar un ligamine a Amazon.com o un
altere sito-libreria (in ille caso, le venditor velle reciper un portion
del profitos - multo indesirabile ma forsan necesse).
Amicalmente,
Chris Burd
|
