Le film _Schindler's List_ era monstrate in Svedia alcun anno retro. In plus
io crede que illo recipeva un Oscar (o plures). Io ipse non videva le film,
ma io ha legite lo que le pressa svedese scribeva del film e vidite
excissiones ex illo in le television.

Heri le medios massive in Svedia reportava que un juvene qui habeva essite
condamnite in le instantia primar pro portar un swastika sur su vestimento
era disculpate in le secunde instantia. Le motivation del corte era que
tanto pauc personas - realmente solo su amicos - habeva potite vider le
swastika que on non poteva dicer que su portar de un swastika constitueva un
excitation contra altere gruppo etnic.

Il ha gruppos neonazi in Svedia, ma illos probabilemente non significa
multo. Si longe que illos non pote appoyar se a un certe pais o un multo
grande organisation, illos non es le periculo, io pensa.

Un grande homine diceva que le historia se repete. Io crede que isto es
false. Le historia non se ripete, solo un poco :-). Isto es, le nazis pote
revenir, ma illos non portara swastikas o camisas brun, ma pote ben vestir
se in cravatto e camisa blanc.

Il me sembla que le opinion mundial non es preparate al conflictos que
erumpe in varie locos del mundo. Jam in 1976 (io crede) io participava un
incontro in Uppsala. Il era un senior del region Rwanda, Burundi, Zaire qui
parlava del conflicto inter hutus e tutsis. Ille parlava esperanto e era
interpretite a in svedese.

De Svedia - como de altere paises - il ha essite missiones religiose in ille
paises. Missionarios svedese ha vivite in ille paises durante decennios,
probabilemente apprendite le linguas local - ma non reportate a su pais
domestic del conflicto.

O prende Yugoslavia! Centos de milles de yugoslavos travaliava in Europa
occidental. Non solo in fabricas, ma etiam in universitates ubique. Svedia
exportava armas a Yugoslavia, viste que officialmente iste pais non haberea
un objecto de attaccas! Ma le opinion international non poteva antecipar lo
que va occurrer.

Io ha ipse vidite exemplos de isto que Croatos habeva - e ancora ha - amicos
Serb e Sloven etc.

Le guerra es un cosa criminal e in le majoritate de casos lo initia
criminales. Il es un facto significante que le victimas civil in le guerra
del Balcanes occidental (mi termino) era plus alte que olim in proportion al
victimas in combattos directe.

Il es multo facile initiar animositates. Solo un exemplo: Personas del
partes nord e medie de Svedia ha difficultates comprender le idioma de
Scania (le provincia Skaane obi il i.a. ha le citates Malmoe, Helsingborg e
Lund). In un publication sur usage del lingua svedese que io lege il habeva
un articulo in re lingua que igneva grande emotiones. In un quotidian local
un persona habeva scribite un littera in re le facto que on non comprende lo
que homines dice e que on usa estranie nomines de varie typos de carne in le
magasines.
  Le replica a isto naturalmente era que si homines vive ci, illes debe
comprender le lingua. "Nos parla svedese e ha nulle difficultate comprender
vos" (= homines del resto de Svedia).
  Suffice que homines de un o altere persuasion senti que illes debe _ager_,
lo que generalmente significa attacar un altere persona, jectar un bomba o
incendiar un pompa de bensina (petrolio, gazolina), e le tote inferno pote
ben esser ponite in action.

Oh, il ha multo dicer de isto, ma que suffice pro hodie!

Amicalmente







Kjell Rehnstroem
Vaenortsgatan 87
S - 75264 Uppsala
email: [log in to unmask]