MERCATO TENSE
Director del Banca Central affirma que ancora non es tempore pro extinguer le
aviso de "cincturas stringite", adverte le BC

Le pejor del turbulentia del "El Niño" financiarie ja passava, "ma le pilota
ancora non extingueva le aviso que da de ordine de mantiner le cincturas
stringite".
    Le evalutation, facite in le fin de septimana al Folha, es de un del
pilotas, le director de Affaires International del Banca Central, Demósthenes
Madureira de Pinho Neto.
    In iste septimana, dice ille, ancora, il habera volatilitate in le mercatos
e movimentos de realization de profitos (vendita de actiones per exemplo, pro
facer moneta).
    Demósthenes diceva que il non habeva alternativa: le governo era obligate a
elevar le taxas de interesses, e que ille possibilitate (confirmate in un
reunion de emergentia del Copom, le Committée de Politica Monetarie, le jovedi)
faceva parte de un "chronograma ja traciate" pro confrontar le crise.
    Le Banca Central optava pro stabilir interesses elevatissime – major que le
plus pessimistic estimativas del bancas –, viste que "nos non poteva currer le
risco de elevar le interesses e le manovra revelar se insufficiente".
    Le director del BC insisteva in emphatizar, nonobstante, que era necessarie
"ager con firmitate e determination" e que passar le TBC ab 1,58% a 3,05% solo
era possibile perque "nos habe absolute confidentia re le soliditate del systema
financiarie brasilian".
    RETORNO PLUS RAPIDE – Questionate si le nove reduction del interesses
mantenerea le rhythmo de cadita anterior – ha essite necessarie duo annos pro
que le taxas cadeva al nivello de 1,58% al mense –, Demósthenes affirmava que
"le retorno sera plus rapide" e que un demora de duo annos "es foras de
cogitation".
    Malgrado le grandor del interesses, pro Demósthenes le pais non suffreva lo
que ille appellava un "attacco speculative classic".
    Le attacco non era localizate, como in le caso mexican, e non era precedite,
como in omne altere casos, per un deterioration del fundamentos del economia.
    "Al contrario. Nostre fundamentos meliora. Le balancia commercial
(exportationes e importationes) de iste mense es melior que lo que le mercato
expectava."
    Le deficit commercial previdite pro iste mense per le mercato es del ordine
de US$ 1,5 milliardos e va restar proxime de o infra US$ 1 milliardo.
    Brasil suffreva plus que su vicinos latin le effectos del "El Niño"
financiarie perque su mercatos, specialmente de titulos del debita externe e de
actiones, es plus liquide – o sia, illos possibilita movimentos plus rapide de
venditas.
    FUGA DE CAPITALES – In le caso del titulos del debita, il habeva ancora un
aggravante. Le major parte del fundos e del bancas comprava ille titulos usante
financiamentos de bancas international.
    Quando le quotationes cadeva, le investitores demandava tirar lor moneta e,
al mesme tempore, le bancas international comenciava exiger le pagamento
anticipate del lineas de credito.
    Ille duo movimentos veniva a ampliar le caditas e provocar reflexos – perque
deveniva plus attrahente investir illac foras que hic intra, mesmo in papiros
brasilian, lo que augmentava le fuga de capitales.
    Nonobstante, diceva Demósthenes, "grande parte" del dollares vendite per le
BC "non es foras del pais, ma in le position comprate per le bancas". E, spera
le BC, illos sera recomprate con le passar del tempore – essente reincorporate
al reservas international (le cassa del pais in moneta forte).
    Le director del BC se negava a dar numeros tanto de perditas de reservas
quanto de lo que ja era recomprate. In le calculos del mercato, le pais perdeva
approximatemente US$ 10 milliardos e ja recomprava US$ 3,5 milliardos.

Ab le jornal Folha de Sâo Paulo (03/11/97), traducite per Ensjo.
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html