Le Die de Interlingua - le 15 de januario 1998 - se approximara
rapidemente. Ci es un lista del arrangiamentos que nos usque ora ha
planificate in Danmark. Per favor, invia me informationes super le
arrangiamentos (grande o parve) in vostre paises. Io los besonia pro le
communication al pressa, pro Panorama e - le plus importante - pro
stimular le participantes del arrangiamento danese le 15 de januario.

** Le 2 de januario: essera expedite un invitation a omne membros del
Union Danese pro Interlingua al arrangiamento in Farum presso Joergen
Kofod-Jensen e su sposa. Con le littera seque un mini-quiz (vide plus
tarde). Le littera admoni le membros - si illes participa o non - a
mesme esser active per:
a) scriber un littera (o plures) al jornales
b) arrangiar con le bibliotheca local que on pone a disposition public
materiales informative de interlingua durante le "septimana de
interlingua" (brochures es livrate gratis per DIU - telephona o scribe)
c) demanda tu medico o dentista, si tu anque pote poner brochures in le
camera a attender
d) ameliora tu cognoscentias de interlingua per un lection per die
durante le "septimana de interlingua"
e) apprende p.ex. 10 nove parolas per die durante le "septimana de
interlingua"
f) procura un nove membro per die durante le "septimana de interlingua"
g) si tu ha accesso a Internet, alora utilisa le "septimana de
interlingua" pro expedir alcun messages (preferibilemente in interlingua

pro demonstrar le lingua) a relevante gruppos de novas, o visita
simplemente p.ex. www.interlingua.com, le sito domestic del UMI

** Le 11 de januario: essera expedite un communication al pressa danese
(ca. 30 grande jornales e radios) mentionante in grande lineas le Die de

Interlingua e le idea de usar lo pro actiones in tote le mundo pro
attraher le attention del publico a interlingua.

** Le 15 de januario: omne membros del DIU es invitate al casa de
Joergen Kofod-Jensen in Farum inter 17 e ca. 19 horas. Le programma
provisori:
a) "Interlingua al via verso anno 2001" - un breve pep-talk per le
secretario de DIU [Thomas Breinstrup]
b) "Assi veniva interlingua a Danmark" - parve causerie per le
presidente de DIU [Joergen Kofod-Jensen] qui anque esseva pionero
c) Le association de supportatores Amicos de Interlingua fusiona
officialmente con DIU e
dona su fortuna a DIU
d) Le juvene designator Jakob Waage qui debutava (in interlingua) in le
parve quaderno
"PLUS" super Teddy le Urso con su excitante banda designate super le
aventuras de Jaco, recipe un stipendio; su banda designate fini per que
le heroe recipe "le Tintin auree" pro su manuscripto - in interlingua.
e) Un parve exposition de libros es arrangiate con le possibilitate de
vider e comprar bon
titulos
f) Caffe/the e conversation commode con multe opportunitate de parlar -
forsan in interlingua
g) Le ganiator del mini-quiz es trovate

** Le 15 de januario (in le vespere): Un nove communication es inviate
al pressa super le die e le stipendio pro Jakob Waage.

** Februario: Panorama e Actualitates publica photos e textos ab le Die
de Interlingua.

********

Ci es le texto al mini-quiz pro inspiration:

13 correcte - un mini-quiz al Die de interlingua

1. Quando esseva arrangiate pro le prime vice le Die de Interlingua?
a) 1976   b) 1992   c) 1981

2. Qui esseva Alexander Gode?
a) famose poeta brasilian, qui scribeva in interlingua   b) millionario
qui supportava le labor de interlingua   c) le ultime director de
recercas de IALA ("International Auxiliary Language Association"), que
elaborava interlingua

3. Un equipa danese-svedese traduceva in 1997 cinque famose contos   de
qui?
a) H.C. Andersen   b) Astrid Lindgren   c) Sherlock Holmes

4. Quante libros con contos de H.C. Andersen ha apparite in interlingua?

a) tres  b) nulle  c) duo

5. In le estate 1998 habera loco ancora un incontro scandinave. Qual
vice es isto que le
scandinavos se incontrara pro planificar actiones commun e excambiar
ideas?
a) le tertie  b) le quinte  c) le sexte

6. In decembre 1997 appareva le volumine del Grande Encyclopedia Danese
con interlingua. Quanto plena le articulo?
a) 11 lineas  b) un medie columna  c) plus que un columna + un scheda

7. Le bibliothecas danese face ab januario 1998 un cambio que ha
signification pro interlingua. Qual es le cambio?
a) interlingua habera gruppos separate pro manuales e litteratura in le
systema de classification decimal  b) on compra un grande stock de
libros in interlingua pro le bibliothecas principal   c) on pote prestar

le libros pro 1+ menses in vice de 1 mense

8. Un vice cata mense, interessatos se incontra a Nyboder Skole in
Copenhagen pro duo horas de e in interlingua. Quando es isto?
a) le 24 del mense (excepte decembre)   b) le ultime martedi del mense
c) le prime jovedi del mense

9. DIU reeligeva in 1997 su presidente, J rgen Kofod-Jensen. Quando
comenciava ille como presidente?
a) 1980   b) 1987   c) 1983

10. Interlingua tosto habera 50 annos. In qual anno es le jubileo?
a) 1999   b) 2000   c) 2001

11. In Danmark, Actualitates ha apparite (sub diverse nomines similar)
como le magazin del membros del DIU desde...
a) 1960   b) 1963   c) 1964

12. DIU esseva fundate le 7 de novembre, gratias al initiativa de
activitas danese. In qual
anno?
a) 1960   b) 1965   c) 1969

13. Proque ha le 15 de januario essite seligite como le Die de
interlingua?
a) A ille data on prendeva le decision de un die special pro
interlingua   b) a ille data in 1951 esseva registrate le
"Interlingua-English Dictionary" in le officio american de derectos del
autor   c) illo coincide con le data del fundation del Union Mundial pro

Interlingua

Nomine:
Adresse:
Numero postal + urbe:

Invia le scheda con le responsas clarmente marcate a:
            Dansk Interlingua Union
            Jxrgen Kofod-Jensen
            Ellegerdspark 79
            3520 Farum
assi que illo arriva al plus tarde le 15 de januario. Inter le schedas
con le maxime numero de
responsas correcte, on trahe un ganiator de un premio.

----

Memora inviar me informationes super vostre arrangiamentos - parve o
grande. Mesmo un contacto con le bibliotheca de poter placiar materiales

informative pro le publico es un nova!

Con mi optime salutes
Thomas Breinstrup