Ponte Irlandese Projice Nove Lumine super Le Etate Tenebrose (alte medievo)

Secundo un articulo in _Science_ (Scientia) de 23 januario 1998 le residuos
de un grande ponte irlandese facite del ligno ha essite discoperte al fundo del
rivo Shannon presso le village antique de Clonmacnoise. A 160 m. in longitude,
illo es possibilemente le plus grande structura del ligno del commenciamento
del medievo trovate usque ora in Europa. Su complexitate technic ha surprise
le archeologos.  Le recercatores ora crede que le ponte, date de 804 del era
christian, esseva le labor de monacos del village vicin de Clonmacnoise.


Secundo le archeologo John Bradley del Universitate National de Maynooth,
"Le ponte a Clonmacnoise comple un lacuna importante." Ille diceva, "Il habeva
necun evidentia de grande pontes in le Europa inter le era roman e circa
1100 c.e."  Morgens Schou Jorgensen del Museo National de Danmark es de
accordo, e adde que illo es probabilemente non le ultime discoperta de iste
genere.  Joregensen es un experto super le grande pontes del ligno constructe
per le vikings plure seculos plus tarde. "Io opina," ille diceva, "que
altere pontes similar essera discoperte in Irlandia, como occurreva in
Danmark post le prime ponte de vikings esseva discoperte in 1932."  Si isto
es ver, il significa que il habeva un rete de communicationes terrestrial
in sito trans Irlandia in le none seculo.

Scafandreros Donal Boland e Mattie Graham, qui se specializa in le
archeologia subaquatic, habeva commenciate lor studio del Rivo Shannon
post incontrar un referentia interessante a un ponte in le _Annales de
Clomancnoise_, scripte in 1158.  Illes se concentrava lor cerca in un
region del rivo de circa 500 m. in largessa presso le ruinas de un
antique monasterio.  In 1994 con le direction archeologic del Fionnbarr
Moore del Servicio de Monumentos National de Irlandia, illes trovava lo
que illes cercava: un antique palo de querco, projicente se del fundo del
rivo.  Usque al ultime autumno illes habeva trovate un toto de 130 lignos,
tote arrangiate nettemente in pares 5 m. a parte, extendente se trans le
plen largessa de 160 metros del rivo. Illes anque trovava nove piraguas
(canoas de lignos extrenchate), de que obreros possibilemente habeva
injecte le pales profundemente in le fundo le rivo, e le residuo de un
systema elaborate de supportos cruciconnecte que supportava un via super le ponte.

Le linea de pales curreva directemente a in le ruinas de un castello norman
del seculo 13tie, ducente les initialmente a creder que le ponte esseva
anque un construction norman. Mais iste theoria esseva excludite post illes
inviava exemplos del lignos de querco al Universitate del Regina a Belfast
pro datar los per analyse del anellos arboree.  Le recercatores, sub su
leader Mike Bailie, diceva que le lignos esseva trenchate in 804, 365 annos
ante le arrivata del normanos de Francia.

Le archeologos alora refocalizate lor cerca al colonia monastic a
Clonmacnoise.  Le urbe de plure milles inhabitantes esseva situate trans
un via del est al west trans Irlandia, cognoscite como le Eiscir Riada,
o Via de Eskar, que transversava le Rivo Shannon a iste puncto. "Le ponte
esseva constructe pro attraher le commercio," diceva Aidan O'Sullivan,
le Director del Archeologia de Clonmacnoise, "e le direction del projecto
esseva probabilemente providite per le monacos."

Le discoperta del ponte a Clonmacnoise ha ducite le archeologos a
questionar si le cognoscentia esseva realmente perdite post le cadita del
Imperio de Roma, al minus in partes distante del Europa que esseva sparniate
le chaos del Etate Medievo.  "Nos sape que le irlandese conservava le
textos roman, e isto suggere que illes anque poteva haber conservate le
technologia e cognoscentia del construction de pontes del romanos," diceva
Bradley.


Stan Mulaik
[log in to unmask]