CAMBIOS IN CIRCULATION DE MONETA RESULTANTE DE ADJUSTAMENTOS DE INTROMISSION E EXTROMISSION DE MONETA 
IN CIRCULATION . 


Stanley Mulaik 


Quando un economia attinge plen empleo e plen production a precios e paga stabile, respectivemente, illo debe adjustar su expendituras a fin que le quantitate de moneta fluente in circulation equal le quantitate de moneta fluente foras. Io basa isto super un modello del economia usante le analyse de fluxos monetari. Le equation basic veni del hydrologia, que es equalmente super le fluxos, in iste caso del aqua: 


IN - EX = ΔC 


Influxos IN minus exfluxos EX del circulation equala le cambio ΔC in quantititate de moneta C in circulation. 


Nos pote expander le equation in alto pro analysar le influxos e exfluxos como fluxos distincte: 


IN - EX = [X + G + I + P] - [M + T + S + R} = ΔC 


ubi 


X = exportos 
G = expendituras governamental trahite del receptas de taxas e le deficit budgetari 
I = expendituras de investimentos 
P = prestation nongovernamental bancari 
M = importos 
T = taxas 
S = sparnios 
R = repagamento de prestos bancari. 
C = quantitate de moneta in circulation. 


Le circulation concerne moneta in transferimentos inter partitos in le economia qui excambia benes e servicios pro moneta. 


Il ha un puncto in tempore ubi S = X + G + I + P a alcun puncto previe. 


Influxos circula inter partitas, cata transaction concernente le excambio del moneta pro benes e servicios; mais possibilemente le un qui recipe le moneta va reservar un parte de illo quando ille o illa compra alque de alcuno altere, tal que in le fin tote partitos reserva un poco fin a tote le moneta intromittite in circulation ha essite ponite in sparnios. 


Isto implica que il es necessari que il ha un fluxo continue de moneta intromittite in circulation pro mantener le quantitate de moneta in circulation a un certe nivello. (Pensa de un piscina con influxos e exfluxos de aqua in e foras del piscina e le necessitate de retener le nivello del aqua a un certe nivello in le piscina—justo plen mais non superfluente). 


Le equation in alto es un equation differential simple. De illo nos pote derivar que le quantititate in circulation C(i+1) equala le quantitate precedente de moneta in circulation plus le cambio ΔC in quantitate de moneta resultante del summa de influxos e exfluxos: 
C(i+1) = C(i) + ΔC(i+1) = C(i) + IN(i+1) - EX(i+1). 


Assi, si le cambio in quantitate de moneta in circulation es positive, le quantitate de moneta in circulation accresce: 


C(i+1) = C(i) + ΔC(i+1). 


Si the cambio in monetate in circulation es negative, le quantitate de moneta in circulation decresce: 


C(i+1) = C(i) - |ΔC(i+1)| 


Assi, suppone que le economia comencia e debe crescer se, alora nos essaya facer le influxos plus grande que le exfluxos. E nos lo face fin a le production e empleo attinge un puncto ubi le quantitate de moneta in circulation C’ es sufficiente pro vender tote benes in le mercato producite a plen production e empleo, a precios stabile. 


Alcun influxos additional positive a iste puncto va facer le quantitate de moneta in circulation excessive, que essera inflationari (pensa que le aqua in le piscina superflue su ripa). 


Le action necessari es reducer le influxos a minus que le exfluxos fin que nos retorna al nivello C’ de moneta in circulation. Isto es a dicer que nos ha necessitate de ΔC < 0. 
Influxos minus exfluxos es negative. 


Quando nos retorna le nivello a C’ nos debe facer ΔC = 0. Alora nos ha un economia in balancia a plen emplo e production a precios stabile. Nos lucta contra le inflation per reducer le influxos a minus que le exfluxos fin que nos retorna le economia a plen production e empleo a precios stabile. (Precios non essera stabile a plen production e empleo quando il ha plus moneta in circulation que es necessari pro vender le benes e servicios a precios stabile. Le partitos con excesso de moneta pro offerer in comprar le benes e servicios pote causar le precios altiar se, assi le inflation). 


Un economia balanciate non es un balancia fiscal. Le moneta es fungibile (moneta o benes de un natura libremente excambiabile o reimplaciabile pro altere benes de un natura o specie similar). E durante que il es ver que G - T = deficit budgetari, il non es necesse que le deficit sia zero tanto longe que il ha altere exfluxos que T pro contrabalanciar le deficit e altere expendituras a plen production e empleo a precios stabile, etc.. 
Assi il ha un infinitate de compositiones de fluxos in IN e EX que va cancellar le un per le altere. 


Lo que isto implica es que nos non debe esser preoccupate con balanciar le budget con le expendituras governamental equal al taxas recepte. Antie, nos debe preoccupar nos con balanciar le economia per adjustar le quantitate de moneta intromittite in le circulation contra le moneta extromittite foras le circulation per un appropriate mixtura de influxos e exfluxos que face le moneta in circulation altiar se fin a le economia attinge le plen production e empleo a precios stabile. A iste nivello C’ nos debe facer ΔC = 0 per appropriate adjustamentos de influxos e exfluxos in e de circulation. 


Nos assi ha un modello de un systema de moneta fiduciari decretate per le governamento, moneta fiat, in le qual nos pote specificar lo que produce le inflation, como le inflation debe esser attaccate e controllate, e que es un ideal situation a attinger e como a attinger lo a partir de un stato deflate. 



Non plus debe nos tractar systemas de moneta fiduciari, o decretate per le governamento, como necessarimente inflationari. Nos pote monstrar quando, ubi e como nos debe stoppar le crescimento de moneta in circulation ultra le nivello que produce le inflation durante que nos ha plen production e empleo con precios stabile. 



--
Pro leger le archivos e pro modificar o cancellar le subscription:
http://listserv.icors.org/archives/interlng.html