Ego es un ver pagan. Ego non adhere al ecclesia svedese, sed ego es educate in
un systema scholar ubi le religion in forma lutheran era le subjecto
Cristianismo. Viste que ego visitava un schola internato ego era subjectate a
multe servicios divin.

Tamen, le religiones me interessa multo, e ego es preste discutar isto. Nos
crede in varie manieras, e si nos pote adjuvar nos mutualmente comprender
nostre vista, isto es bon. In le conferentias de interlingua que io ha
assistate il ha essite servicios divin o cantar de hymnos ecclesiastic. Ego
non protestava, malgrado le facto que ego lo trovava multo estranie. Ma on
certo facerea grande oculos si ego venirea con le Martello de Thor o le signo
del Sol (vole ben non currer a troppo rapide conclusiones! Isto scribe un
persona qui habita 20 minutas per autobus del centro del pagan religion de
Svedia! Visitante le vetere Uppsala ego sempre senti le alas del historia
antechristian. Isto da un multo interessante perspectiva!

Sed, ego es un persona tolerante, e ego non ha protestate contra iste
practicas in le conferentias, forsan ego deberea facer isto, sed si le
personas vole lo facer, proque non, sed le demanda es si mi religion
incontrava tanto de supporto!?

Sed viste que le religion joca un multo importante rolo in varie paises, ego
pensa que il es necessari que nos pote discuter lo. Etiam iste vocabulario
debe esser practicate. Pro me il es multo interessante saper le differentias
del Guardatores del Turre e un pastor evangelic e lor differente vista a Deo.
Isto es multo interessante. Qual opportunitate.

In un private message - a Mario in un altere lingua - ego le narrava de un
experientia phantastic que ego habeva con mi studentes de svedese. Nos era
lutheranos, ego in le semipagan tradition svedese, grecoorthodoxos, muslimes
sunni e shi'a, e nos omnes amicalmente! discuteva le varie differentias, sin
que un probava convincer le alteres. Nos solo narrava de nostre differente
vistas.

Isto es un del optime momentos in mi vita. Que ego videva que humanos pote
discuter un cosa sin esser irate un al altere. Il es un cosa extrememente
deplorabile que nos non pote facer isto mesmo in interlingua, le lingua de
communication interhuman.

On pote optar pro le uso de interlingua con empathia, con voler saper, con
voler comprender, e non solo pro facer injuria un al altere. Lassa nos vider
le differentias. Lassa nos discuter los. Nos non debe esser inimicos pro isto.
Nos pote esser ancora plus de amicos comprendente nostre differentias.

Tal differentias que exclude altere personas es un altere cosa, lo que es
comprensibile per se ipse!

Amicalmente