In Atlanta al hora currente le major anxietate es equalmente
con le mosquitos.  Il face duo annos depost que le virus de
West Nilo ha apparite in Nove York Citate.  Le virus es
portate per le mosquito como un vector, durante que le
aves es le prime 'reservoir' in le ambiente in que le virus
habita.  Le mosquitos picca le aves, suge lor sanguine e
in le processo, ingere le virus.  Alora quando le mosquito
tal infectate picca un humano, illo transfere le virus as
humano.

Le maladia del virus del West Nilo es generalmente non seriose
pro le majoritate de humanos.  Mais personas con un debile
systema immunal pote suffrer le encephalitis, con possibile
morte.

Proque le virus es portate per aves a nostre region circa
Atlanta del nord, nos ha expectate le virus a apparer tosto
in nostre region.  Illo ja lo ha facite.  Justo iste passate
mense, un ave morte - un corvo - esseva discoperite al bordo
inter mi stato de Georgia e Florida a posseder le virus.
Alora alcun pauc aves morte con le virus appareva in le
vicinitate de Atlanta.  Cata die le jornales ha un articulo
super le numero de aves morte discoperite posseder le virus
aquelle die.  Le gentes ora vade a lor magazines de quincalia
pro comprar le varie insecticidios e altere devicios pro
capturar e occider le mosquitos.  Le jornales dice a nos que
nos debe cercar nostre casas e le vicinitate pro discoperir
fontes de aqua non fluente e a eliminar los.  Le mosquitos
pone lor ovos in tal aquas non fluente, donde lor larvas e
pupas pote crescer a devenir nove mosquitos.

Mais le problema es ora exacerbate per le invasion de un
nove specie de mosquito, le mosquito tigre de asia.  Iste
specie veniva de asia in un imbarcamento de vetere pneus
in aqua de pluvio que ha entrate le pneus.  Le imbarcamento
veniva a Houston, Texas, io crede, que habeva un climate
quasi tropic proprie pro le propagation del mosquito
tigre.  Illo ama le aere calide e humid.  Depost alora
illo ha extendite se al stato de Florida (e tote le
statos inter Texas e Florida), e illo ha venite a Georgia.
Io ha vidite los.  Illos es characterizate per haber
bandas blanc super lor pedes, durante que le resto de
lor corpores es nigre.  Illes es alquanto plus parve que
nostre proprie mosquitos, plus aggressive.  Le periculo
de iste mosquito es que illo pote esser un vector que
porta le encephalitis, le dengue, le febre jalne, le
malaria, e io suppone le virus de West Nilo tanto ben.
Ante isto nos ha eradicate le febre jalne, e le dengue
es rar, ben que illo es trovate in Central America.
Illo es un omnivector.  E su population cresce
rapidemente in le est, durante que le sec conditiones
del statos del West del Statos Unite retarda su
extension a la.

Un additional problema con le mosquito tigre es que
illo pote poner su ovos in le aqua de parve cavos in arbores.
Illo non require multe aqua.  Isto face difficile a
eliminar su base de propagation.  On non pote simplemente
drainar un palude a eliminar iste mosquito.

Mi interesse in mosquitos veni de quando io esseva un
puero.  Mi patre esseva un biologo, e durante le Guerra
Mundial II ille esseva empleate in le estate como un
inspector pro mosquitos in le Valle de Salt Lake Citate.
Cata die, quando ille veniva a labor, io veniva con ille.
Nos visitava tote le stagnos in le valle.  Le centro pro
le minuition de mosquitos habeva un officina, ubi il habeva
mappas de tote le valle, super le qual esseva scribite le
varie stagnos, parve e grande, con un numero pro cata un.
Quando mi patre discoperiva alcun larvas o pupas de mosquitos
in un stagno, ille usava un mappa con ille a locar le stagno
e trovar su numero super le mappa.  Alora quando al fin del
die ille retornava al officina, ille poneva parve spinulas
colorate in le locos del stagnos super le mappa del
officina.  Un equipa de petroleoeros viderea le locos de
iste nove discoperite mosquitos, e le proxime die illes
vadeva in lor camiones cisterna plen de petroleo e altere
substantias chimic e irrorava le petroleo super le superfacies
del stagnos.  Le petroleo se formava como un tenue pellicula
super le superfacie del stagno, que preveniva que le larvas
e le pupas del mosquitos poteva levar lor tubos pro aer supra
le superfacie, e illes suffocava.  Plus tarde verso le fin
del Guerra, nos recipeva le DDT, que esseva mesmo plus
effective.  Le importantia de iste labor esseva le existentia
de plure hospitales in le stato de Utah pro le truppos
mal e ferite del guerra contra le japonese in le Sud Pacific.
Multos de iste truppas habeva le malaria, le dengue e altere
maladias portate per mosquitos, e le authoritates  non voleva
que iste maladias deveni establite in le population de
mosquitos in noste pais.

Con le preoccupation del guerra al fin, un simple transferimento
de pneus a nostre pais ha destruite toto de iste previe labor
pro eradicar e eliminar le maladias portate de mosquitos a
nostre pais.

Mosquitissmemente,
Stan