Salute Anne e omne alteres!
Ego me senti un poco culpabile in isto que ego demandava del UNIX. Ego crede
que ego es un plus incapabile computario que tu. Lo sol al que ego es
capabile es pressar le claves /le tastatura.

Nunc in le tenebras novembral on se senti quasi le tempore stava immovente.
Le vicinos non reguarda le television con forte volumen, omne homines es
alicubi, e in le silentio ego scribe le message a vos.

Si vos ha vidite le programmas de television con Ray Bradbury qui introduce
su historias ex su camera de travalio vos pote imaginar le aspecto de mi
appartamento. Illo aspecta como un officina con aspirationes bohemic.

Viste que vos omnes certo es cavalleros de ordine etc. ego non vole indulger
in un description plus detaliate del interno del appartamento.

Io vive sur le plan terrestre. Mi grande camera duce a lo que nos appella un
_terassa_ un "balcon jacente sur le terra" lo que significa que ego pote
passar immediatemente in le sino del natura, que es un gazon con vegetation
de herba e lo que io crede es sorbos.

Apud iste mini-gazon il ha le trotoire, le via pro pedestres e apud illo le
strata pro trafico motorisate e biciclos. Isto in turno significa que il ha
un assatis substantial ruito in le nocte. Ego ha trovate que un auto me
evelia cata nocte al hora 4 tempore estive. Evidentemente il se tracta de un
idiota qui transporta un collega al travalio e ille idiota non comprende que
on debe exstinger le motor quando on es stante (secundo le lege a mi aviso).
Non obstante isto da le possibilitate seder se ante le computator e prender
contacto con le amicos trans le aquas e le montanias.

Sur le altere latere del casa il ha lo que ego vole appellar un corte (un
"yard" si non justo le scotlandese! - "Kjeeeeelll Sherlock Holmes
evidentemente ha invadite tu cerebro, que tu te teni al tema!) - Excusa me.
Ben. Il ha un corte con duo enorme betulas albe - le quales secundo mi amico
le ingeniero bibe enorme quantitates de aqua. Dum le vespere in le estate e
le die del hiberno ille betulas reflecte le sol a in mi cocina, que es sin
sol durante le parte hibernal del anno. Durante le estate in contrario, le
sol se jace in mi cocina como un simfonia de lumine, lo que me place. Le sol
apud nos joca un altere rolo que apud Ensjo, pro exemplo. Ille lo certo
reguarda como un inimico del qual ille tenta se proteger per parasoles e
altere cosas. In nostre latitudes le sol rarmente es si calide. On pote quasi
sempre lo vider como un benefactor in le lumine del qual on pote sider e
calefacer se.

In le hiberno le sentir del calor del sol es un cosa plus tosto metafisic que
nos lasa pro le momento.

Ego habita assatis central in Uppsala, lo que significa que ego pote ir per
pede in quasi omne partes del citate ubi ego vole me transportar. Isto me
place enormemente, pro que ego non ama sider in le autobuses ubi il sempre ha
un persona ante o post me qui es attacate per un frigido (o forsan le
influenza (grippa!). Marchante a pede ego inhala plus de aere -
possibilemente fresc - e ha excercitio de mi corpore, lo que me rende pensar
un massa de pensatas interessante.

A mi corte... ibi passa personas de varie extractiones. Il ha familias
iranian, de India, ego ha vidite ciganos de finlandia. Interessante. Ego ha
multo poco contacto con omne illes. Toto es multo quiete e aggradabile.

Gradualmente in le cognoscer me melior vos potera complettar le detalios in
iste description.

Habitualmente

Kjell R.

P.S. In le AOL on pote complir un si nominate profilo. Interessante saper si
VOS vide alque de iste profilo in mi messages, pro que illo sembla esser
salvate presso illos. Ego ha comprendite que illo es pro ille homines qui
cerca altere membros del servicio. Le question dunque: Esque vos vide in mi
messages alque plus que le adresse. le linea "subjecto", le "corpore" del
texto e le via del message?