Washington, D.C., Centos de milles de manifestantes
contra le guerra vadeva heri al stratas in reaction a
un reunion hispano-britanico-statounitese in le
archipelago portugese del Azores, qualificate per
Washington como le "ultime stadio" del processo
diplomatic.
Pro evitar lo que nunc pare un guerra imminente, Iraq
invitava Hans Blix e Mohammed ElBaradei a viagiar a
Baghdad "tan tosto como sia possibile"--un invitation
que es in le processo de "studio" per illes.
Germania, Russia, e Francia, per su parte, proponeva
un reunion del Consilio de Securitate del Nationes
Unite a nivello ministerial pro establir un calendario
pro disarmar Iraq, "immediatemente post un programma
de studio e travalio" que le inspectores presentara le
lunedi, secundo un communicato publicate per le
ministerio german de relationes exterior.
Dominique de Villepin, le ministro de relationes
exterior de Francia, declarava que Germania, Russia, e
Francia adoptava un declaration tripartite pro
promover "un nove reunion de urgentia" del Consilio de
Securitate.
Villepin tamen recognosceva que "le determination
statounitese e le stato de preparation militar
appuncta a un guerra".
"Pro le Statos Unite," ille addeva, "il remane multe
pauc dies [al presidente iraqi]."
Milles de manifestantes se reuniva al mediodie inter
le Casa Blanc e le Capitolio in Washington. "Nulle
sanguine a cambio de petroleo", diceva illes. "Iste
guerra es mal. Le pace es patriotic," indicava lor
placards, "non le guerra."
Le mobilisation esseva considerabile in Italia, ubi in
Milano protestava plus que 400.000, secundo le
policia, e 700.000, secundo le organisatores del
manifestation, contra un possibile guerra in Irak.
In Espania, le policia informava que unes 150.000
manifestantes habeva paradate per le stratas del
capitales provincial, ben que le organisatores de iste
manifestationes insisteva que le ver numero esseva
unes 300.000 ultra alteres que paradava le nocte
anterior in Madrid e Barcelona.
In Francia, 55.000 personas, secundo le policia, e
inter 60.000 e 80.000, secundo le organisatores,
vadeva per le stratas de Paris, durante que in
Marseille le manifestation attraheva inter 4.500 e
10.000 personas.
In le America latin, centenares de argentinos e
chilenos vadeva per le stratas principal de lor
capitales respective pro dicer "no" al guerra.
(Ex "La Opinion", Los Angeles, California, 16 martio
2003, p. 2A)
__________________________________________________
Do you Yahoo!?
Yahoo! Web Hosting - establish your business online
http://webhosting.yahoo.com
|
