Ben venite, Marten, a INTERLNG.  Isto es un bon loco pro practicar le
interlingua. Nos es un gruppo diverse, de plure nationalitates, fides,
philosophias, e professiones. Lo que nos ha in commun es un interesse
in practicar le uso de interlingua.

Io es un vetere interlinguano, qui ha discoperite interlingua in 1953,
visitava Dr. Gode in 1961 post plure annos de correspondentia con ille,
e inter 1970 e 1995 ha devenite inactive in interlingua, prosequente
interesses professional (io es un psychologo, specializante in le
statistica multivariate e le studio del personalitate e psychologia
industrial), professor a Georgia Tech. In 1995 io ha vidite un message
de Kjell Rhenstrom al gruppo de novas sci.lang in interlingua, e ha
respondite con messages del mie.  Frank Pfaff hic ha vidite los, e
ille deveniva inamorate con interlingua, creante INTERLNG pro nos toto.
Assi nos discute le tempore in nostre paises, le prototypos de parolas,
le poesia, le traduction, o scribe essayos in interlingua pro alteros
a leger.  Io spera que vos va trovar nostre compania tolerabile e que
vos va ganiar in vostre practica de interlingua.

Stan Mulaik