Paul,
   Io implora vostre pardonas.  Io non ha vidite le :-).
   Io opina que sin le anglese e su absorption massive del latino
le idea de un cohesive lingua internatonal haberea habite minus
fortia in 1940, quando IALA moveva su recerca de Anglaterra a
Nove York.
   Que le anglese es hodie un lingua international, possibilemente mesmo
auxiliar pro multe parlantes, es solmente proque su dissemination
incorpora tote le fortias que historicamente ha levate linguas
al stato de linguas international: cultural, economic, e militar poter.
   Interlingua ha como base pro su successo como un lingua auxiliar
le successo de su linguas a base in diffunder se.  Initialmente il
habeva le successo del romanos, alora lor ecclesia, alora le nove
scientias del renascentia e le usage del latino medieval como un
lingua auxiliar del scientia, alora le successo del francese quando
Francia se leva a poter militar e economic, e le sucesso del espaniol
in su colonization del mundo occidental, e in le interim le musica,
le arte, e le architectura de italia, e finalmente le successo del
anglese e lor colonias in diffunder se per le mundo occidental e
asian.  Io opina que le real imperialismo del lingua anglese venirea
con su imposition como le lingua auxiliar del mundo occidental.  Isto
es possible, mais alquanto improbabile.  Le espaniol in le americas
central e del sud, e le portugese va limitar le dissemination del
anglese alla.  Interlingua es un compromisso neutre in Europa.
   Nonobstante, interlingua pote exister mesmo si le anglese deveni
un lingua auxiliar major, como un ponte inter le populos del sud de
Europa e de central e sud America.
   Io es indifferente a si o non un parola international es del
francese, italiano, espaniol, o anglese (o germano o russo). Le idea que
in sequer nostre regula de tres que nos sanctiona le imperialismo de
anglese es a me absurde.  "Imperialismo" in iste caso es un mal
metaphora, proque il suggere que le anglese se diffunde per le
truppas del Statos Unite, durante que il es actualmente le
cultura american, su technologia, su cinema, su musica (con le beetles
de anglaterra), su scientias que es tanto attractive al resto del mundo,
que es le 'fortia' que diffunde anglese a altere linguas.  (Le mesmo
esseva le ration proque in Gallia le latino esseva acceptate per su
invaditores, le populos germanic: le cultura roman, su superior
administration).
Amicalmente,
Stan Mulaik