Jay Bowks wrote:

> Car Ramiro,
> Io concorda con te que il ha multe moneta
> pro esser trovate in le media televisive,
> e il ha un oligarchia que controlla illo
> que appare in le canales al aere e al cablos.

Ego concorda con le expression "moneta parla". Jam in le 70-s il habeva un
grande discussion crear un canal internordic de television. Per le
programma Nordsat on haberea le possibilitates vider omne le svedese
canales in Finlandia, omne le finnese canales in Svedia; television
islandese in Danmark e Norvegia etc. Viste que il habita alcun 300.000
personas de lingua finnese in Svedia e c:a 8 procentos parla svedese como
lingua maternal in Finlandia, in reguardo del facto que multe daneses
labora in Svedia e que il es multo bon si etiam le publico in omne le
paises nordic se accostuma al linguas del alteres (on poterea crear un
tremende mercato cultural pro exemplo); in vista de toto isto on deberea
haber un programma televisive internordic! Sed que deveniva: NIHIL.
Question: Proque? Le politicos e humanos de cultura allegava que "Il non ha
un ganio in que on pote vider Dallas* con titulos in finnese o svedese.
Isto significa solmente un augmentation del imperialismo cultural
american." Nulles pensava del facto que le textar de tal programmas es in
facto etiam un action cultural. Si non, humanos va reguardar los in
versiones anglese e non va poter expressar iste contento in le linguas
national.

Ma lo que le politicos in le paises nordic e le spiritos belle de dicte
paises non poteva accomplir, isto solveva moneta statounitese. Nunc il es
possibile abbonar se a un canal eclectic nordic con programmationes con
subtitulos in anglese de omne le paises Scandinave. On debe solmente
guardar se de transmitter programmas con mammas feminin nude o parve
infantes baniante se al nudo (toto normal ci e nulle cosa estranie) pro le
gusto public in le statos e le guardatores de decorum in dicte pais. Sed
nonobstante. Le moneta ha parlate e il ha un canal. In iste maniera, in le
caso que on es adherente a un certe rete nordamerican on pote fruer del
canal internordic, vider le Doctor del Archipelago, Tres Coronas, Matador,
In medio del natura e altere interessante programmas, on debe poter leger,
ma isto es toto, e le personas qui comprende linguas nordic pote gauder se
de ascoltar su linguas native.

On incontra le factor de intertenimento etiam in le caso de interlingua.
Quante vices ha ego non audite: "Esque vos non ha un jornal diurnal (un
tautologia, ego lo sape!) in interlingua? Proque non ha vos un magasin
septimanal?!" e le responsa es, il non ha humanos qui lo vole o pote
scriber. Isto costa moneta. Etc. Si il ha un interesse vider altere cosas
que le telenovelas in le television on debe colliger un multitude de
humanos e prender moneta ab illos pro formar un tal rete. "Per fortias
unite al successo" poterea esser un motto conveniente.

Cellus