[OC] Iste texto in ortografia colateral :^)

FOLHA DE SÃO PAULO
TENDENTIAS/DEBATOS
*******************
ES LE ECONOMIA BRASILIAN VULNERABILE A ATACOS SPECULATIVE?
-- SI
*******************
BRASIL IN LE CENTRO DEL HURACAN
(Celso L. Martone)

    Brasil es hodie, per qualcunque criterio, un del paises emergente plus
vulnerabile a un crise cambial.

    Le deficit in conto currente brasilian corresponde a 30% del deficit de tote
le paises in disvelopamento e a 80% del deficit del paises del America Latin. Le
compromissos externe de curte termino (debitas usque un ano plus amortization e
interesses) atinge 120% del stock de reservas. Le activos financiarie interne
representa sex vices le stock de reservas, lo que es un indicator importante in
un economia financiariemente aperte. E assi in avante.

    Lo que le mundo vive in iste momento es le traumatismo de un violente
adjustamento descendente del precios del activos real (actiones e imobiles), que
se originava in Asia e, in un mercato globalizate, rapidemente se propagava per
tote le mundo. Le adjuste de precios de activos sempre involve le fenomeno
cognoscite como "ultrapassage": le precios cade multo infra su nove equilibrio
de longe termino pro, lentemente, converger a ilo.

    Le economias que habe nule disequilibrio fundamental (un deficit elevate in
conto currente, per exemplo) pote confrontar ile processo sin fracturas
importante. Felicemente, ile es le caso del economias central (SUA, Union
Europee, Japon); per consequentia, le probabilitate del mundo haber alique
similar al crise del anos 30 es multo parve.

    Le crise atinge con major gravitate le paises emergente, economias plus
fragile e plus dependente del fluxos international de capitales, e tanto plus
gravemente quanto major le disequilibrios interne de ile economias.
Infelicemente, iste es le caso de Brasil.

    Le mercato mundial reevaluta al alto le riscos del titulos del paises
emergente, lo que implica un reduction de lor participation in le cartieras del
investitores institutional.

    Perque le volumine de ile papiros es plus o minus fixe a curte termino, tote
le peso del pression venditorie cade super le precios, que colabe. Le titulos
brasilian es le leaders in le caditas de precios, lo que es un indication de que
le mercato atribue un risco elevate al pais.

    Le prime linea de defensa contra le crise cambial es le elevation brutal del
taxa de interesses interne, lo que ja esseva facite per le Banca Central in le
fin de septimana. Es multo probabile que le augmento del interesse inverte o al
minus cessa le perdita de reservas con multe rapiditate (in duo o tres dies). In
ile caso, le taxa de interesses pote retornar non al nivelo anterior, ma a
nivelos tolerabile.

    Si, per hasardo, ilo non eveni, non es possibile mantener le interesses in
ile nivelo alte per multe plus tempore, sub pena de fracturar le sistema
financiarie. Le ultime linea de defensa, alora, esserea un disvalorization
cambial, que venirea como un acto unilateral per le governamento o per le
liberation del taxa pro fluctuar in le mercato.

    Un implication importante de ile crise, mesmo essente ilo debelate in le
proxime septimanas (lo que es multo probabile), es que le grado de
vulnerabilitate de Brasil, ja elevate, augmentava ancora plus, rendente plus
problematic le permanentia del politica economic actual in 98. O sia, le proxime
ataco speculative incontrara le pais plus debile e plus sin defensa que ora.
--
   ENSJO*: EMERSON JOSÉ SILVEIRA DA COSTA
  E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
 UIN ICQ : 713833   [* "sj" pronunciate "sh"]

INTERLINGUA - lingua auxiliar international
    Info : http://www.interlingua.com
 Grammar : http://www.nautilus.com.br/~ensjo/interlingua/english.html