Ignacio,
   In le Statos Unite le libertate de religion e le separation del
ecclesia del stato ha facite americanos tolerante de altere religiones
(plus o minus).  A me il non es importante si o non le Sudario de
Turin es realmente le sudario in que Jesus esseva cingite, mais io
respecta illes qui trova conforto in creder que illo lo es.  A me
le religion es a tractar alique como si illo es vostre ultime
preoccupation, proque nostre ultime preoccupation pote revelar se in
qualcunque cosa.  Le problema es a differentiar le fundo infinite
que es le objecto de nostre preoccupation ultime revelate in le
cosa que foca nostre preoccupation del cosa finite mesme, e a faller
in facer iste distinction, nos cade in le idolatria. Ben que io non
es solmente un christiano, io accepta le Jesus super le cruce como
le criterio per le qual on pote judicar le pretensiones idolatrose.
Jesus es un objecto de nostre preoccupation ultime, mais in loco de
sacrifacer nos a illo, le objecto de nostre preoccupation se sacriface
pro nos.  Le objecto de nostre preoccupation ultime se denega durante
que illo ancora es nostre objecto de preoccupation ultime, e in isto
illo deveni mesmo plus vermente le proprie objecto de nostre
preoccupation. Per le finite es revelate le infinite fundo de nostre
existentia.

Per iste analyse es revelate le periculos del fundamentalismo de
qualcunque fide, proque le fundamentalismo gravita verso le
idolatria, per levar le finite mesme a esser le objecto de nostre
ultime preoccupation in loco de vider per le finite le infinite
fundo transparente per illo.  Un Deo que Se sacriface pro nos sin
que nos nos sacriface pro Ille supera le demonic attraction al
finite que es possibile in tote objectos de preoccupation religiose.

Iste analyse anque provide le criterio pro judicar le idolatria in
tal moderne religiones como le communismo e le fascismo que in perder
un senso del infinite leva le finite a un objecto de nostre preoccupation
ultime pro le qual nos debe sacrifacer nos pro su objectivos.

Stan Mulaik