Salute,

Ora il ha sovente bon activitate in le canal de chat (confabulation)
#interlingua - me place multo le conversationes ibi, e io participa
frequentemente. Isto es un excellente maniera a practicar le uso active
de interlingua, e plures ha jam comenciate apprender interlingua de
iste maniera e ha devenite bon parlatores.

Io vole de nove invitar personas qui non ha ancora probate conversar in
#interlingua a entrar le chat (desde le pagina principal del sito
www.interlingua.com, o via un programma IRC usante le servitor
irc.discussioni.org).

Ma il ha ancora un problema. Personas sovente entra e parti le canal
consecutivemente sin attender le venita de altere participantes; illes
attende un o duo minutas e parti le canal si illes non recipe un
responsa immediatemente. Multe personas entra le canal durante un die ma
sin incontrar le unes le alteres. De iste maniera, le canal remanera
sovente vacue o inactive.

Dunque, un aviso: si tu entra le canal e non recipe un responsa, non
parti, ma relega le fenestra del canal al fundo (i.e. disactiva lo sin
clauder lo) e face altere cosas in-linea como navigar le web, e controla
de tempore a tempore le fenestra de chat pro vider si un altere persona
ha entrate. Assi, tu habera finalmente un partner de conversation - e un
tertie persona qui entra trovara un canal active, e de iste maniera le
congregation pote crescer.

Con programmas IRC, como per exemplo mIRC
<http://www.mirc.co.uk/translations/interlingua.html> es possibile facer
sonar un signal audibile quandocunque un persona entra le canal, assi
que tu non necessita controlar le fenestra de chat activemente.

Benvenite a #interlingua!

- Martijn (McDutchie in IRC)