Mesmo un examination superficial de credentias human
revela que le humanitate non ha ulle inclination a
cercar le veritate e que le absurditate e obscuritate
non es repellente de ulle maniera pro le major parte
de nos ma, al contrario, nos attrahe
irresistibilemente.
Il ha diverse rationes pro iste tendentia, ma le plus
general inter illos es que le claritate e le logica
impone sur nostre pensamento limitationes sever que
preveni que illos satisface nostre desiros, odios, e
capricios.
Si nos exprimeva isto in un terminologia freudian
inexacte ma evocative, le Principio de Realitate in se
deberea assecurar nostre continue uso del logica e del
claritate.
Ma iste principio sovente impedi que nostre ideas se
conforma con le Principio del Placer, le qual sempre
nos guida verso un maximo de comforto emotional,
permittente que nos crede ulle cosa que nos trova
agradabile sin reguardo a su veracitate.
Nostre persecution del Principio del Placer haberea
nulle limites si nos non habeva besonio pro
informationes precise sur le natura de nostre
ambiente. Sin iste tipo de informationes digne de
fide, il es obvie, nos non poterea manipular nostre
ambiente pro satisfacer nostre desiros.
Le circumstantias que dicta que nos abandona le
Principio de Placer pro le Principio de Realitate
depende sur le gravitate del penas infligite sur nos
per le realitate a causa del falsitate de nostre ideas
concernente su natura.
Le severitate de iste retribution depende de quanto
exige le realitate ex nos. Si nos naviga sur le mar
in un parve nave, conceptiones false sur le currentes
del aqua e grosse petras submarin poterea causar
nostre naufragio e mesmo costar nos nostre vitas.
Ma nos pote creder ideas le plus absurde sur le
philosophia e le religion omne nostre vitas e mesmo
attraher discipulos qui sempre nos adorara a causa de
illos.
(Adaptate del texto de Stanislav Andreski in "Social
Sciences as Sorcery", New York, Saint Martin's Press,
c1972, p. 89)
---
Le scientias natural non advantiava a causa del
popularitate universal del rationalitate. Lor
opponentes theologic, classiciste, e metaphysic non
esseva convertite ma displaciate.
Omne le universitates ancian debeva esser compellite
per pression exterior a provider opportunitates pro le
cultivation del scientias, e le major parte del
nationes del mundo ganiava un respecto pro le
scientias solmente post esser vincite per armas
disveloppate con le adjuta del physica e del chimia.
Le ration basic pro le triumpho del scientias es que
illes qui los cognosceva vermente ben poteva controlar
gente qui esseva ignorante de iste disciplinas. Le
magia perdeva non a causa de su manco de popularitate
ma proque illo non poteva competer contra le
complimentos del scientia.
Ma ben que on abandonava incantationes magic pro
controlar le natura, lor potentia remani plus efficace
que le argumentation rational pro manipular grande
turbas de gente. E in le conducta de affaires human
le manipulation de superstitiones e ideologias vacue
(e religiose e secular!) etiam nunc es le maniera le
plus efficace pro ganiar ricchessas e potentia
politic.
Mesmo un examination superficial del linguage del
politica revela que le imprecision e le obscuritate
offere grande avantages in le lucta pro le
popularitate. Quasi omne politicos sape que le
secreto de successo politic es le apparentia de esser
le amico de omnes con le preservation simultanee de
manieras de abandonar obligationes que eventualmente
poterea causar embarasso o difficultates plus grande.
Un doctrina o un systema ideologic es ideal si illo
appare nobile in su objectivos, manteniente
simultaneemente justificationes pro actiones a vices
fortemente ignobile. E solmente le obscuritate
doctrinal permitte un radio de action tan grande.
On pote identificar simile tendentias in le emergentia
del scientias social. Un importante factor in lor
professionalisation ha essite manieras de provider
travalios facile pro lor practicantes.
Ora, le travalio le plus facile es le exegese
interminabile de textos ben cognoscite. E le
opportunitate de multiplicar tal explicationes cresce
in un proportion directe con lor obscuritate.
Un autor (como Hegel o Husserl) qui se explica de un
maniera tenebrose e ponderose pote dar travalio a
innumerose commentatores qui essaya describer lo que
illes vermente voleva dicer. Un corpore crescente de
tal commentarios anque se nutri le unes ex le alteres,
e tal activitates exegetic deveni vermente perpetue.
Autores como David Hume e Bertrand Russell, qui scribe
de manieras clar e precise, crea nulle
opportunititates pro tal commentaristas e assi
generalmente deveni minus admirate. Le pensatores
plus obscure deveni famose principalmente a causa del
empleo que illes da a innumerabile intellectuales qui
ha formate grande industrias ex lor activitates
exegetic sterile.
(Adaptate del anglese de Stanislav Andreski in "Social
Sciences as Sorcery", New York, Saint Martin's Press,
c1972, pp. 92-93)
__________________________________________________
Do you Yahoo!?
Yahoo! Tax Center - forms, calculators, tips, more
http://taxes.yahoo.com/
|
