Car amicos,
Cata duo annos le interlinguistas in Scandinavia, i.e le
cultivatores del "lingua belle", como dice Jay, de Danmark,
Norvegia e Svedia se assembla pro un Incontro de un fin
de septimana. Iste anno illo essera un Incontro Nordic,
proque nos expecta hospites tamben ab Finlandia, in prime
loco Allan con su sposa.
Jam in Strasbourg Jan e io discuteva le possibilitate de persuader
Leland e Frank Pfaff, le duo americanos ibi presente a participar.
Sed proque solmente illes? Cata interlinguista qui se trovara
in Europa durante le ultime septimana de julio 1998 essera benvenite!
Le Incontro Nordic habera loco le 24-26 de julio e essera
precedite, jovedi le 23 usque al vespere del venerdi, per un
curso intensive pro comenciantes e quasi-comenciantes.
In le postmeridie del venerdi usque al postmeridie del dominica
vos habera le occasion de vider facie a facie e de parlar con
Bent Andersen, ("Sr Interlingua"), Thomas e su familia, Arne
Pedersen, Allan, Jan, Bertil, Claes, Kjell R, Kjellt e Steinar
(nos spera!), Jesper, Ove, forsan Piet e Peter Gopsill
(nos non ancora sape isto) - tote le nomines familiar del gruppo
INTERLNG - e multe, multe alteres. Conferentias e Incontros
de interlinguistas dura - practicamente - 24 horas per die.
Quando on non discute o mangia o face conversation, on
canta o discute - sed dormir non es un prioritate inter le
occupationes... Que pensa vos???
Loco: le schola-internato (standard de un bon hotel)
Sundsgarden in le urbe svedese Helsingborg, vis-ā-vis Elsinore
(distantia de 30 minutas per le ferry-boat, ubi se trova
le castello de Hamlet). Sundsgarden, ubi se teneva le
11-e Conferentia International in 1991, es situate sur le litore
del stricto Oresund inter Danmark e Svedia. Ab le fenestras
le daneses pote vider lor pais pro satisfacer lor nostalgia (si
on haberea tempore pro -algias).
Costos toto includite inter 1845 SEK (coronas svedese) e 1155 SEK
pro jovedi-dominica e inter 1110 e 700 pro venerdi vespere-dominica.
Un SEK = 0,125 US$. Le region es belle, le luna super le promenadas
sur le litore es romantic...e vos incontrarea le "Lista" e nos - le
fortunatos -
incontrarea v o s !!!
Aeroporto Copenhagen-Kastrup + autobus directe a Helsingborg.
A revider?
Amicalmente, Ingvar, (qui lo organisa e responde a vostre questiones).
Ingvar Stenström,
Vegagatan 12, S-432 36 Varberg, Svedia
Tel. +46-/0/340-15053
<[log in to unmask]>
<[log in to unmask]> <[log in to unmask]>
|
