SI ILLOS AMBULA PER LE CELO, ILLOS SOLO POTE ESSER DEOS

(?) De ubi ha venite le nomines del planetas del Systema Solar?

(!) Cinque millennios retro, quando le sumerios qui habitava le Mesopotamia
(Le Iraq de hodie) reguardava le celo, illes notava que cinque stellas se
moveva durante que tote le alteres pareva immobile. "Illos era le planetas
visibile. Mais illos ha essite considerate deos", conta Walmir Cardoso,
presidente del Societate Brasilian pro le Inseniamento del Astronomia, in
São Paulo. Illos ha ganiate, assi, nomines de divinitates, que plus tarde
ha essite adaptate al mythologias grec e roman.

   Hastive
   Con le minor orbita inter tote le planetas del Systema Solar, iste es
   ille que curre le plus rapido per le celo. A causa de isto, illo ha
   recipite le nomine del messagero del deos -- Hermes, pro le gregos, e
   MERCURIO, pro le romanos.
   Miss Universo
   Necun stella o planeta brilla tanto in le firmamento. Nihil plus juste
   que si illo recipeva le nomine del dea roman del bellessa, VENERE, le
   Aphrodite del grecos.
   Hic mesme
   Le antiquos non mesmo suspectava que le Terra era un planeta. Como
   supponer que illo habeva alcun relation con ille luces movente se per le
   celo? Pro illes, illo era le centro fixe del Universo: le solo, le
   TERRA.
   Militar
   Iste luce rubie, color de sanguine, ha recipite le nomine del divinitate
   grec del guerra, Ares -- MARTE pro le romanos. Le mesme deo regeva le
   mense de martio, in Roma, quando era realizate le ceremonias pro
   demandar sorte in le campanias militar del imperio.
   Superbe
   Ille brilla multo e se move lentemente perque su orbita es multo
   distante del Sol. Le grecos ha relationate su comportamento soveran al
   major del deos, Zeus, le JUPITER del romanos.
   Quasi stoppante
   SATURNO, Chronos pro le grecos, es le patre de Jupiter. Deo del tempore,
   ille ha regnate inter tote le divinitates usque esser disthronate per le
   filio. Le senior del horas e del dies ha essite associate al luce que le
   plus lentemente ambulava per le firmamento. Tanto lentemente que solo le
   observatores le plus patiente poteva notar su movimento.
   Fratello
   Le antiquos non cognosceva iste planeta, que solo ha essite notate in
   1781, post que le telescopios ha comenciate a esser usate. Si Chronos
   (Saturno) era le patre de Zeus (Jupiter), le logica mandava que le
   proxime planeta serea su avo, URANO, qui non ha correspondente roman.
   Ille deo era le celo personificate, fratre de Gaia, le Terra.
   Toto azur
   Sin voler, le francese Urbain Jean Joseph Le Verrier, qui ha discoperite
   iste astro in 1846, ha seligite le appropriatissime nomine de NEPTUNO,
   le deo roman del aquas e del mares, Poseidon pro le grecos. In ille
   epocha, ille ni imaginava que le atmosphera del planeta era azurate. Le
   Verrier, postea, voleva appellar Neptuno per su proprie nomine, mais le
   communitate scientific ha rejectate le plano narcissista.
   Infernal
   Le nomine del deo grec del mortos e del foco, sin similar roman, ha
   essite adoptate per initiativa del studiante anglese Venetia Burney. In
   1930, al 11 annos, illa ha inviate le suggestion al recercatores -- per
   pur intromission infantil --, salvante le none planeta de esser
   appellate Percival. Il era illo que pretendeva le sposa de Percival
   Lowell, le astronomo qui, dece-cinque annos antea, habeva previdite le
   existentia de PLUTON in le confinios del Systema Solar.
---
Traducite de REVISTA SUPERINTERESSANTE, Anno 13, Nº 1, Januario 1999 per
Ensjo.