Un pictura per Vincent Van Gogh de un strata in Paris se ha exponite prime vice post plus que 100 annos in collectiones private.

"Un Scena Stratal In Montmartre" ha essite possedite per un familia francese durante le major parte del tempore desde que Van Gogh pingeva lo in 1887.

Sothebys estima que illo potera se vender pro usque octo million euros (£6,9m) quando illo se vendera al auction.

Un experto super Van Gogh, Martin Bailey, dice a BBC News que "prime vice nos pote vider lo ben".

Parve reproductiones ha essite facite anteriormente, sovente in nigre-e-blanc. "Lo que excita nos es que illo es un pictura de Van Gogh que ha essite latente desde que illo veniva del cavalletto del artista," dice Sr. Bailey.

"Illo ha semper essite in collectiones private, dunque solmente le proprietarios e lor amicos cognosceva lo."

"Illo es un pictura interessante proque illo es un obra transitional inter le annos hollandese de Van Gogh, quando ille pingeva per colores obscur e terrose, e le obras exuberante que ille faceva in Provence. In Paris ille discoperiva le Impressionistas, e se duceva a explorar color."

Illo es un de un serie de obras que Van Gogh creava quando ille habitava con su fratre Theo in 1886 e 1887 a un curte distantia ab le strata in le pictura.

Sothebys diceva: "Le apparition in le mercato de un obra de iste calibre, e de un serie tanto iconic, es sin dubita un evento grande."

Montmartre era ancora semi-rural quando le scena era pingite. Un molino de vento es visibile detra alicun homines ambulante. Le famose ecclesia Sacre-Coeur que nunc domina le quartiero se construeva tunc.

Van Gogh translocava ab Paris a Francia meridional in 1888. Ille moriva presso Paris in julio 1890.

https://ichef.bbci.co.uk/news/976/cpsprodpb/A423/production/_117191024_vangogh1_reuters.jpg


Secundo BBC News





--
Pro leger le archivos e pro modificar o cancellar le subscription:
http://listserv.icors.org/archives/interlng.html