Scribeva Allan Kiviaho:

> Estimate Communitate Interlinguista,
>
> Heri era publicate un documento multo importante,
> acutemente observate per 28 membros e candidatos
> membros (non oblidante Turchia) del Union Europee:
> Le projecto preliminar pro le constitution europee
> per le Convention del Futuro de Europa, presidite
> per Valéry Giscard d'Estaing.

Io senti le necessitate de exprimer mi gratias a Allan Kiviaho e a Piet
Cleij pro le interesse que illes ha manifestate reguardo a iste thema que io
ha in mi corde.
Gratias a iste manifestation de interesse io me senti un poco plus citatano
europee e in bon compania.
Ante-heri le presidente Valéry Giscard d'Estaing era justo a Roma pro iste
nove "tractato", in consideration que le prime se usa nominar le "tractato
de Roma". Actualmente in Italia on parla de Statos Unite de Europa. Le Euro
ha facite miraculos (nonobstante le augmentation del costo del vita).

Mi activitate quasi exclusive durante iste dies reguarda  le proxime
election del burgomaestro de mi Treviso con le 40 membros del Consilio
comunal.
Io initiava un mense retro como membro de un comitato contrari al
realisation de un park interrate a tres planos justo a 4 metros de mi domo.
Un eventual realisation que non considera que Treviso es un citate
denominate de aquas perque le faldas aquifere (water-bearing) curre subtus
le prime duo metros del crusta terrestre. E nos sape que le faldas aquifere
non perdona e se manifesta con lor fortias ubicunque illos pote trovar un
nove curso. Le domos pote ruinar.
Ab iste civil battalia contrari al park interrate, ora io es in prime linea
pro le constitution de un Lista civic pro le election administrative del
proxime maio 2003.
A iste momento io exprime le anima in internet del movimento popular e non
solmente isto.
Le percurso del proxime dies non sera facile e totevia illo es
enthusiasmante, mesmo pro le nove reportos que io incontra con mi
concitatanos. Toto es in rapide evolution.
Ora io non pote proponer al attention mesmo Interlingua e, totevia, io lo ha
ben presente anque como consequentia del vices que io scribeva que nostre
dialecto de Treviso e Interlingua ha un grande similantia.
Ora mi Treviso, que jam era in le annos 1230, ha retornate a esser citate
sede de universitate e vole esser sede del nove Humanismo Latino. Un grande
projecto cultural de interesse international, jam multo active in ultra a
sedes de cursos universitari de alte specialisation (agricultura, enologia,
etc.).
Il sera un belle occasion in le multo proxime futuro de mi citate si nostre
gruppo in evolution habera successo. Assi in ultra a un melior qualitate del
vita realisate mesmo con le pedonalisation (pedestrianization) del centro
historic del citate, nove planos del traffico, del sonos, del pollution, del
parcos natural, etc., forsan venira le die pro proponer al attention del
citatanos Interlingua.
Io ha iste sonio.
Il se tracterea de mover nos ulteriormente verso le idea de Europa que, pro
nos, es un realitate que es in nostre vita quotidian e justo anque verso le
Paises nove o proxime membros del UE, in particular le Romania, ubi nos es
presente con plus de 6,000 interprisas de Treviso. Le phenomeno se nomina
delocalisation del interprisas, como dicer portar le interprisas ubi le
obreros es plus disponibile.
Nos videra in le proxime menses, intertanto io labora in iste direction.

Mario, pro Europa e Interlingua.