In dominica il habera electiones al parlamento europee. In alcun paises, i.a.
Danmark e Nederland, on ha jam habite ille electiones. In Svedia e le alteres
vota a dominica. 

Contra le union e toto que illo personifica:
Restar o non restar?
Le campania electoral es caracterisate de un grande portion de indolentia e
indifferentia. In grande sectiones del populo svedese le discussion ancora
tracta le question "Debe nos adherer al Union o debe nos sortir de illo?" 

Nos debe pensar del paises extra le union anque. Nos non pote construir un
fortessa Europa que per grande muros exclude omne altere paises. 

Pace e guerra
Svedia ha essite un pais non-alliate, e isto ha adjuvate nos star extra duo
guerras. Nos ha habite pace durante duocentos annos, e nunc le elite politic
vole crear un armea europee. Nos non vole que le union esserea un grande
potentia militar.

Le moneta
Secundo le factos in le agitation al radices herbal (the grassroots) le
question es: Quanto nos profita del membrato in le Union. Nos (= Svedia) es
stupide que paga tanto e recipe nihil. E nos non debe adherer al Union
Monetari Europee, le euro. 

Le carne a hormones
E il ha le carne hormonal que veni del USA e que nos non vole ci in Svedia! E
le representante del partito liberal dice que le Union probabilemente non
succedera interdicer le importo de tal carne, lo que le Statos Unite vide como
un obstacula al libere commercio. 

Le democratia
Svedia e le altere paises nordic es democratias. Il ha un principio de
transparentia que es multo plus disveloppate quam in le altere paises del
union. 

In le union on ha deficientia de democratia, il es un elite politic que non se
interessa in le benesser del populo, ma solmente prende moneta in su proprie
tascas. (Vide le minsitro francese). 

Pro
Restar o non restar?
Le antagonistas dice que nos debe sortir del union, ma isto es un projecto de
pace, e viste que il ha un forte tendentia de crear un federation, le creation
de ille federation jace in un distante futuro. 

Nos pote acceptar le globalisation o non, ma illo existe, e le paises Europee
debe collaborar, e plus del paises del Europa oriental essera facite adherer
al union. Isto assecurara un unitate de regulas, un possibilitate de libere
movimento trans le frontieras de humanos e capital.

Un plus grande contacto e collaboration inter le varie paises va occurrer, non
importa si in le sino del Union o non. E nos ha iste projecto de collaboration
que es iste union. Lassa nos usar lo.

Pace e guerra
Ben, Svedia ha escappate le guerra supportanto nunc le un nunc le altere
grande potentia. In facto le alteres ha guarantisate nostre libertate e pace.
Nos debe finalmente esser solidari con le altere paises. 

In plus le idea de Svedia como un pais non-aliate es un chimera, un illusion
per le qual on ha alimentate le vulgo. Quando le regente socialdemocrates
parlava del pace e non-alliantia on secretemente jam in le 50's habeva un
clandestine collaboration con NATO. Omnes qui debeva saper de isto, lo sapeva. 

Finalmente Svedia debe assumer su responsabilitates e adherer a NATO si tosto
que possibile.

E del resto, reguarda nostre defensa que tote le tempore es diminuite. Nos
debe adherer al defensa international. Il costa troppo pro un parve pais con
le ridicule 9 milliones de habitantes e un enorme territorio de defender se
ipse sin le collaboration con altere paises. 

Pro mantener nostre industria supradimensionate nos debeva exportar armas a
qui poteva comprar, e malgrado un sever controlo parlamentari del venta de
armas de Svedia, nos succedeva exportar armas al tal paises pacific como
Yugoslavia (!) Le serbos ha un pluritate de armas defensive de fabrication
Bofors. 

Un fortia commun del Union essera pro solver crises in varie paises e non pro
menar guerras offensive....

Le moneta
Le valuta svedese es troppo micre. In un turbulentia international valutario,
e considerante que le commercio valutari es momentanee, nos debe adherer a un
grande e possibilemente forte valuta como le Euro. Le plus grande entreprisas
ha jam adaptate se al Euro, e illo venira, non importa si nos lo vole o non.

Vide ceterea le population a Tornedalen, le Valle de Torneo ubi le fluvio
Torneo forma le frontiera inter Svedia e Finlandia. Al latere finnic on jam es
in plen transition al Euro e le svedeses a su latere del frontiera es plus in
favor del Euro que le resto del pais. Mesmo alcun communas (citates e
communitates rural, le prime nivello de administration) ha proponite que on va
poter usar le euro.

Per consequente nos naturalmente debe adherer al euro.

Carne hormonal
"Nos pote permitter le importo, ma postular, que le producentes marca le
carne, assi que nos como consumtores pote vider qual carne nos compra e in
ille maniera permitter al mercato functionar secundo su leges."

Democratia
Mi argumento personal:
Ben que - observante de ci in Svedia - le union ha un aspecto multo elitista
nos debe augmentar le democratia in illo. 

A mi aviso le idea que le democratia esserea plus grande in Svedia pote ben
esser un illusion optic. Svedia ha in plure casos perdite casos de derectos
civil in le corte de Europa e ha facite multo poco pro complir al decissiones. 

Assi pro exemplo un proprietario de un restaurante esseva bloccate de un
synticato de travaliatores pro que su personela non adhereva - e non voleva
adherer - al syndicato (le trade union). Per consequente su interprisa
bancruptava. E le representatne del governo svedese - on ha officiosemente
concedite isto - dava information inaccurate in su presentation del caso ante
le corte de Europa. 

Ma como io comprende le coas, il ha in le paises nordic un forte tradition de
participation del stratas del populo, le vulgo on forsan dicerea in le
circulos del elite in Brusselas, que es multe forte. 

Io, Kjell Rehnström, es del opinion que nos debe collaborar con le populo in
le altere paises del Union. A mi aviso le uso de omne le linguas national es
un resultato de prestigio e jectation de arena in le oculos del opinion
public. Io ha antea citate le prime candidato del socialdemocrates qui diceva
in un intervista radiophonic:
– "Quando le politicos del parve paises membros del union parla in su proprie
linguas, e on debe poner auricularios (headphones) pro ascoltar le traduction,
le delegatos comencia leger Le Monde o International Herald. Tanto que io va
usar non solo le svedese." (Ille es ancian instructor de espaniol e francese....).

Interlingua pote de facto jocar un rolo pro approfundar le democratia e le
collaboration con le herbiradices del union. 

Como debe on votar pro assecurar le expression de su opinion in Svedia? A mi
aviso assi:

Si tu es decissivemente contra le union e facticamente vole que Svedia lassa
le union si possibile rapido vota: 
Le partito ecologic - le verdes. 
Le Leve (ancian partito communista de Svedia)

Tu pote etiam votar con le Centro (le ancian partito agrari) ma isto es
riscose e tu debe informar te de que le varie candidatos pensa. 

Si tu es decissivemente pro le union e un amico decissive de un plus federal
union, vota con le Liberales (Folkpartiet). Lor prime candidato e un
attrahente de votos es Marit Pålsen, nascite in Norvegia. 
(Opinion personal:) Illa es un extremememte intelligente femina qui sape de lo
que illa parla, le agricultura e consumtion e le creation de conditiones
pacific inter le populos de Europa.

Si tu es pro le union ma forsan non troppo federalista, vota con le Moderatos
(ancian partito conservative).

Pro le union ma con aspecto del valores christian, etic e con un interesse in
le cosas proxime al humano parve, vota le Christian Democrates. Le prime
candidato de lor lista es - como ille se appella - Anders Wijkman. (Ancian
liberal, ancian conservative (e io crede mesmo ancian socialdemocrate!) Un
habile technocrata, ancian presidente del Cruce rubie. Hmmmm.

Si tu es pro le union ma non vole votar pro le liberales o le moderatos,
proque tu appertine al movimento laborista, vota pro el Socialdemocrates, ma
reguarda qual candidato tu marca, viste que candidato Pierre Schori es pro e
le candidata Maj-Britt Theorin es contra le union e contra omne cosas militar.

Si tu es contra toto vota pro le Democrates de Svedia, un partito fascistesc
que certo non ganiara multe votes. Un escellente maniera jectar su voto al
laco (como nos dice in svedese).

Io ha nunc essayate dar un impression del electiones in Svedia. Io spera que
isto dara a vos alcun idea. Io ha probate declarar mi proprie pros e cons ma
esser del resto si objective que possibile.