LE CAPSULA DEL FUTURO
Per le prime vice, un homine implanta un chip in su proprie corpore.
Durante novem dies le computator ha essite como un extension del organismo
del ingeniero anglese Kevin Warwick. O ha essite le contrario?
Vidite de longe, illo mesmo espaventa. A pena ille arriva, le porta del
bureau se aperi per se. Le luce del vestibulo se accende como per un passe
de magica. "Holla, professor Warwick", dice un sexy voce electronic
feminin. Le micro se accende automaticamente. Le programma de navigation in
le Internet se carga per se e ja exhibe sur le schermo le pagina initial.
Le posta electronic se activa e avisa quante messages nove ha arrivate.
Tote le equipamentos del bureau se anticipa a su gestos, como si illos lo
recognosceva. Lo pejor es que illos le recognosce de facto. Si qualcunque
altere persona entrarea in le sala, nihil occurrerea.
No, non es phantasmagoria. Kevin Warwick, 44 annos, professor de
Cybernetica al Universitate de Reading, proxime a London, decideva apportar
su profession al ultime consequentias e deveniva un subjecto de probas. Un
del objectivos del Cybernetica, al final, es studiar le relation del homine
con le machina. Warwick se submitteva a un chirurgia, con anesthesia local,
e implantava un capsula de vitro in le antebracio sinistre, continente un
bobina electromagnetic e un chip. Ille deveniva, assi, le prime esser human
con un circuito electronic integrate al corpore.
Le resto del experientia es pur technica. Quando Mr. Chip se approxima al
entrata, un dispositivo installate in le porta mesme actiona le bobina
intra le capsula. Ligate al chip, illo transmitte un signal de 64 bits con
un codice secrete. Le equipamentos disseminate per le ambiente dispone de
sensores que lege le codice e transmissores que repassa le signal a un
computator installate in le bureau mesme. Le computator alora coordina le
activation del machinas, toto per undas de radio. Assi, quando le
homine-cyborg se approxima, le apparatos pare activar se per se. Il ha un
unic inconveniente: on non pote cambiar de idea e extinguer le luce, per
exemplo, con un commando a partir del chip. Solo manualmente, o
programmante le computator pro facer lo post un certe tempore
predeterminate. Toto debe esser ben plannate. Mais pro Warwick isto es le
minime del males. Toto habeva essite previdite.
Post novem dies, le capsula ha essite retirate del bracio pro evitar
reactiones allergic. Le experientia esseva un grande successo, malgrado
circumscripte al bureau del professor al universitate. In su casa necun
sensor ha essite installate. "Mi sposa non esserea de accordo", contava
ille. "Con le chip intra le corpore, nos nos senti troppo proxime al
computator, nos nos senti ligate, como duo geminos siamese. Il es como si
io habeva un affaire extraconjugal."
PASSAPORTE PRO LE FUTURO ELECTRONIC
Jelosias a parte, le experientia de Warwick es le prime a unir homines e
machinas in aquello que pote esser un nove pacto faustian ? le mythic
accordo inter le homine e le diabolo describite in le drama _Fausto_, del
scriptor german Johann Goethe (1749?1832). Mais ora il esserea un contracto
technologic. In excambio pro le conforto, le homine delegarea al
computatores le controlo de lor quotidiano. Theoricamente, un chip
implantate in le corpore tamben poterea advocar le elevator, cocinar le
dinar in le furno, calefacer le aqua del cupa de banio, e refrescar le vino
blanc usque al puncto exacte, si tosto que su portator quitta le bureau,
post un fatigante die de travalio de homine bionic.
"Le potential es enorme", dice Warwick. "Nos potera communicar nos con le
machinas per medio de signales emittite de intra nostre corpores mesme."
Isto permittera que chips electronic interrate in le bracio potera servir
como carta de credito impossibile de robar o de perder se. Il esserea
viabile tamben un documento de identitate que immagazinarea informationes e
datos personal, como un specie de carta de identitate sempre
_prêt-a-porter_.
Il es per isto que, "del puncto de vista del technologia, iste implantation
es phantastic", lauda le ingeniero biomedic Sérgio Siqueira, del Instituto
do Coração (Incor), in São Paulo. "Mais del perspectiva social illo es
tremendemente polemic", ille adde rapido. Secundo Siqueira, sempre existera
le risco que operationes de iste typo ducera a un terribile invasion del
intimitate. Warwick mesme sentiva le controlo in su carne. Le chip in su
corpore permitteva que le computator central, e quicunque lo operava,
monitorava cata un de su movimentos intra le edificio del universitate,
tote illo plen de sensores.
Mr. Chip es un enthusiasta del possibilitates que le nove technologia
aperi, ben que tamben ille face advertentias quanto a su uso. "Iste
avantiamento technic es realmente desirabile", dice ille. "Mais nos debe
decider super le questiones moral e ethic de permitter le vigilantia de
alcuno 24 horas per die." Con le successo de su tempore de cyborg,
perspectivas se aperi pro nove experientias. "Io volerea ligar un circuito
al systema nervose human pro excambiar signales con un computator", dice
ille. Divina _qui_ va esser le campo de probas? Ille mesme, claro. In junio
del anno 2000, Warwick intende installar un chip, non in su capite, cosa
que esserea troppo periculose per ora, mais in un termination nervose del
bracio. E, si isto functionara, ille ira avante. "De ora a cinque annos io
vole facer un implantation in le cerebro." Si alcuno in plus acceptara le
defia, Mr. Chip intende stabilir un communication radioelectronic con le
altere subjecto. Que seniora Warwick sia attente!
---
Traducite de Revista SUPERINTERESSANTE, Brasil, Decembre de 1998.
Ensjo.
|
