Rehnquist - Marionettista Politic

Le Precedente de Iran-Contra

Durante le previe decennio, Rehnquist e altere judices
del banco federal ha aventurate al terreno politic.

In politic caso clave post politic caso clave, illes
ha protegite e avantiate le interesses del hierarchia
Republican, initialmente defensivemente, alor
offensivemente.

Un momento clave veniva con le scandalo de Iran-Contra
que erumpeva in le novembre de 1986, in le medie de
revelationes que le Casa Blanc de Ronald Reagan habeva
operate un guerra secrete in Nicaragua, fundate in
parte, per venditas illegal de armas al governamento
islamic radic de Iran.

Le officiales del Casa Blanc esseva revelate in facer
mendacios super e Nicaragua e Iran.

Le responsa del administration Reagan-Bush esseva a
sacrificar alcun poc officiales de basse nivello,
tal como Lt. Col. Oliver North e insister que officiales
senior habeva essite rendite ignorante del affaire.

Pro avertir un crise constitutional, Democrates in
Congresso se concordava con isto, concentrante lor
critica super North e lassante Ronald Reagan e
su vice-presidente George H. W. Bush libere.

[Le democrates, con le exception de Senator John
Kerry de Massachusetts, adoptava un similar approache
de vider necun mal al evidentia que le rebellos
contra nicaraguan appoiate per le SUA esseva
implicate profundemente in le traffico de cocaina.

Vide _Lost History_ per Robert Parry pro plus detalios].

Le Factor Walsh

Le copertura de Iran-Contra incontrava difficultates,
nonobstante, quando le accusator special Lawrence Walsh
conduceva un investigation methodic que revelava un
strato de mendacios le un post un altere.

Walsh esseva previemente un judice republican qui
esseva cargate per un pannello de tres judices in
1986 pro investigar le caso.

Aquelle pannello habeva a su capite un altere
Republicano senior judice del Corte de Appellos
del Statos Unite, Judice George MacKinnon.

E Walsh e Mackinnon esseva conservativos republican
traditional del era Eisenhower qui videva lor
debito como le prosecution del justitia e le veritate,
malgrado considerationes del politica.

Al comenciamento del prime administration Bush, Walsh
vinceva le convictiones contra North e John Poindexter,
le avisor super securitate national a Ronald Reagan.

Conservativos Irate

Republicanos battaliava desperatemente pro prevenir
le expansion del scandalo a Reagan e le nove
presidente Bush, le patre del currente presidente.

In "Firewall" [Barriera contra le Foco], le libro
per Walsh super le scandalo de Iran-Contra, le
accusator special describeva como le appunctatos
de robas nigre in le Corte de Appellos del Statos
Unite, "attendeva como le reservas strategic de
un armea incirculate."

Un leader de iste faction de partisanos esseva
Judice Laurence H. Silberman, un conservativo
strepitose qui habeva servite como un avisor
super politica extranee al campania de Ronald
Reagan in 1980.

A un puncto durante le scandalo de Iran-Contra,
Silberman reprobava MacKinnon super su appoio
pro le lege del accusator special.

"A un conferentia del circuito in le Districto de
Columbia, ille [Silberman] habeva ingagiate se
in un excambio de clamor super le consilio
independente con Judice George MacKinnon,"
scribeva Walsh.

"Silberman non solmente habeva opiniones
hostil mais pareva tener los con ira."

In le appello de North in 1990, Silberman
se jungeva con un plus juvene conservativo,
Judice David Sentelle, pro superar le tres
contos criminal contra North.

Le voto esseva 2-1.

Ironicamente, in decider pro North, le duo judices
de lege e ordine, decideva expander le derectos
de defendantes in casos de immunitate limitate,
tal como aquello que le Congresso ha date a North.

Sentelle, un protegite de conservativo Jesse Helms,
R-N.C., serviva tamben in un pannello de secunde
appello que superava le conviction de Poindexter
secundo similar fundos.

Malgrado le inversion del convictiones, Walsh
continuava facer progresso.

In le comenciamento de 1992, ille faceva casos
del obstruction del justitia contra previe
Secretario de Defensa Caspar Weinberger e plure
senior officiales del Agentia Central de Intelligentia.

Le caso veniva multo proxime a alora Presidente
George W. H. Bush.

A aquelle puncto, Walsh recipeva un appello
de telephono de MacKinnon con alcun novas disturbante.

Le Chef Judice del Supreme Corte del Statos Unite,
Judice Rehnquist, qui controllava le appunctamentos
al pannello de tres judices del accusator special,
habeva decidite a remover MacKinnon, le alliato
vetere de Walsh.

Como un salvaguarda contra le partialitate in le
pannello de tres judices assignate de selectionar
le accusatores special, le lege stipulava que
in appunctamentos al pannello, "prioritate essera
date a judices senior del circuito e a judices
pensionate."

Aquelle provision semper ha essite sequite - usque
1992 quando Rehnquist derogava iste provision e
selectionava un judice junior active del banco
federal, Sentelle.

Appunctate per Reagan, Sentelle habeva date le nomine
'Reagan' a su filia.

Ultra le facto que ille mancava le stato 'senior',
ille esseva famose como un del plus politicamente
partial judices super le banco federal.

Appunctate per Reagan, Sentelle habeva nominate
su filia, Reagan, pro le ex-presidente.

Sentelle tamben continuava de denunciar le liberales,
mesmo post su appunctamento al banco federal.

In un articulo publicate in le Harvard Jornal de Lege
e Politica Public in le hiberno de 1991, Sentelle
accusava 'hereticos del sinistre' de voler transformar
le Statos Unite a un stato collectivista, egalitarian,
materialistic, racialmente consciente, hyper-secular
e socialmente permissive."

Per selectionar Sentelle, Rehnquist assecurava que
futur accusatores special esserea plus in accordo
con le necessitates politic del republicanos.

Le decision de Rehnquist e su continuation de
Sentelle in aquelle position per le 1990s duceva
a un serie de accusatores special conservative qui
esseva molle in tractar republicanos e dur in
fustigar le democrates.

Standard Duple

Le prime accusator special de Sentelle esseva nominate
quando un scandalo se levava in le autumno de 1992 super
le cercas illegal del administration Bush del documentos
super le passaporto de Bill Clinton - cercante pro
materia derogatori que pote esser usate pro assecurar
que George Bush esserea re-electe.

Le pannello de Sentelle da iste proba politicamente
sensitive a republican partisano inconditional Joseph
diGenova, qui gereva un investigation que revelava
le culpabilitate de multe republicanos mais que
concludeva que le operativos de Bush esseva innocente.

Post que le administration de Clinton comenciava,
le pannello de Sentelle selectionava conservativos
del linea dur pro investigar le democrates.

Republicano Donald Smaltz esseva nominate a investigar
le Secretario de Agricultura, Mike Espy.  David Barrett,
qui habeva essite un chef de homines de lege pro Reagan,
esseva selectionate pro investigar le Secretario de
Casas Henry Cisneros.

E plus de nota, le solicitor general de Bush, Kenneth
Starr, esseva selectionate pro investigar Presidente
Clinton, initialmente super le caso de Whitewater e
plus tarde super altere allegationes.

In testimonia al Senato in 1999, Sentelle explicava
que ille conscientemente selectionava adversarios
politic pro conducer iste investigationes.

Sentelle diceva que ille cercava republicanos
"qui habeva essite active al altere latere del
linea politic" pro investigar Clinton e su administration.

Ultrapassante le vista de multe expertos legal que
accusatores debe esser impartial como possibile -
ni amicos ni inimicos del persona sub investigation -
Sentelle equalmente habeva applicate su strategia
de selection differentemente quando le subjecto
esseva un administration republican.

Alora, ille selectionava un republican pro gerer
le investigation.

Benque Sentelle testificava alteremente, il pareva
clar que su real criterios pro selectionar un
accusator special in casos sensitive esseva a
selectionar un republicano.

Le Cacia del Presidente

Alcun criticos del investigation Starr concludeva
que su interminabile inquestas - de cosas relativemente
trivial tal como le negotios del Clintones in
Whitewater, le dismissiones del Bureau de Viages
del Casa Blanc, le erronee livration del dossieres
del BFI al Casa Blanc, le mendaciettos de Clinton
super su vita sexual - amontava a "un cacia del
presidente".

Mais si o non Clinton se exponeva al suspiciones, il
ha pauc dubita que iste investigationes consumptive
del tempore prendeva lor pedage.

Frequentemente coordinate con gruppos de politica
conservative e media del dextra, le investigationes
debilitava le presidente politicamente e creava le
climato pro su incrimination in 1998 pro su
testimonio tergiversante super un affaire sexual
con un empleata del Casa Blanc, Monica Lewinsky.

Arguibilemente, le mano celate de retro iste strategia
anticlintonista esseva le Chef Justitia del Corte Supreme
del Statos Unite, qui habeva selectionate Sentelle, qui
in vice, selectionava le accusatores special.

Ante su morte in 1995, MacKinnon diceva a su familia
que si ille habeva remanite in carga del pannello
del accusator special, ille non haberea selectionate
Starr.

Un filio, James D. MacKinnon, diceva que Judice
MacKinnon habeva facite objection al appunctamento
de Starr in 1994 a causa de su apparentia del
partialitate que se levava de su position senior
in le previe administration.

Judice MacKinnon equalmente exprimeva essente
disturbate per le apparentias frequente in public
per Starr, que le judice opinava "esseva totalmente
inappropriate pro un advocato independente," James
MacKinnon diceva.

"Mi patre semper opinava que advocatos independente e
judicios debe esser extraordinarimente discrete con
alcun annunciamentos public, e esser tanto anonyme
como possibile e simplemente a facer lor obra."

Le impression lassate a multe americanos - que
Clinton esseva responsabile pro un large varietate
de scandalos ethic - esseva partmente create per
Rehnquist per su selection de un judice junior
con forte motivos ideologic pro gerer le
investigationes de Clinton.

Transferimento a Gore

Le assalto de octo annos de Clinton esseva portate
al campania de 2000 durante que le Committee
National Republican e le campania de George W.
Bush laborava diligentemente pro junger Vice
Presidente Al Gore al supponite "sordiditate
de Clinton".

Bush faceva promissas de restorar le "honor e
dignitate" al Casa Blanc e le Republicanos
exaggerava le allegationes super le honestia de
Gore in un strategia non tanto subtile a ligar
Gore al deception de Clinton super Lewinsky.

Secundo le sondages, le Republicanos attingeva
alcun successo in iste effortio de corrumper
Gore.

Totevia, al 7 de novembre, le votantes american
prefereva Gore a Bush per plus que un medie
million de votos.

Gore esseva in fronte in le Collegia Electoral.

Bush poteva vincer solmente per pretender al
25 votos electoral de Florida, ubi ille habeva
un margine de victoria de solmente alcun poc
centos de votos.  Recontos limitate, nonobstante,
mangiava a aquelle margine.

Le situation pareva sever pro Bush quando al
8 de decembre le Corte Supreme de Florida
ordinava un revista in le integre stato de scrutinios
que habeva essite rejecite per machinas a contar.

Le reconto comenciava al matino del 9 de decembre.

Immediatemente, le scrutinieros comenciava de
trovar numerose votos legitime que le machinas habeva
omittite.

Le operativos de Bush mitteva objectiones al cortes
pro retardar le inclusion de iste votos como votos
pro Gore.

In le interim, le homines de lege de Bush hastava
al Corte de Appellos del Statos Unite in Atlanta
pro stoppar le contos.

Benque dominate per conservativos, aquelle corte
trovava necun fundos pro intervenir.

Un Bush frantic se tornava al Corte Supreme in
Washington.

Alla, al fin del post meredie le Corte faceva
le passo sin precedente de stoppar le contos
de votos facite per citatanos american.

Judice Scalia faceva clar que le objecto del
action del Corte esseva a prevenir que Bush se
arrestra in le conto e assi leva questiones
super su legitimitate si le Corte le declara
effectivemente le victor.

Aquelle resultato "projicerea un nubo" super le
"legitimitate" de un presidentia eventual de Bush,
explicava Scalia.

"Contar primo e decider le legalitate postea non
es un recepta pro producer resultatos de electiones
que ha le acceptantia del publico que le stabilitate
democratic require," Scalia scribeva.

Confidentia in le Lege

Nonobstante, al 11 de decembre, Gore e su homines
de lege exprimeva confidentia que le regula de lege
prevalerea, que le Corte Supreme del Statos Unite
levarea se super alcun partialitate e insister que
le votos sia contate e que le voluntate del votantes
sia respectate.

Le equipa de Gore appareva in fronte del corte
apparentemente ancora non consciente del realitate
que il non importa lo que illes argueva, le cinque
judices conservative esseva determinate de facer
Bush le succedente Presidente.

Toto lo que remaneva esseva a producer un ration.

Le prime - que le Flordia Corte Supreme habeva facite
'nove lege' - cadeva al latere quando le corte del
stato inviava a Washington un decision modificate
le vespere del 11 de decembre.

Aquello impelleva le cinque conservativos a retirar a
Plan B - lassa O'Connor e Kennedy devisa un altere
argumento, le rationamento de "protection equal'.

Con aquello in su loco, al nocte del 12 de decembre,
le cinque conservativos faceva George W. Bush le prime
Presidente a perder le voto popular in plus que un
centuria in entrar le Casa Blanc.

Quando Rehnquist dava le juramento de officio a
Bush como le 43tie Presidente le 20 de januario,
le acto esseva complete.

Un Passo verso le Dictatura

Le pensata in Washington que prende le desiros pro
realitates clarmente spera que le intervention del
Corte Rehnquist in le processo politic esseva justo
un anomalia - alque que le majoritate conservative
faceva con reluctantia pro le bon del pais.

Mais aquello justo non se accorda con le ultime
decennio de un poter judicial que ha devenite
accrescentemente partial de plus in plus a
intervenir pro injuriar su inimicos politic e
adjutar su amicos politic.

Aquelle realitate de un poter judicial profundemente
politicizate - ben disposite de manipular casos
judicial pro objectos partisan - equalmente significa
que le natura del democratia american ha cambiate.

Con su position unic como le final arbitrator del
lege american, le Corte Supreme del SUA, controllate
per cinque conservativos, ora ha appropriate le
poter de usar le logica speciose pro superar le
voluntate del populo american.

Le action del Corte in unguer George W. Bush como
presidente ha movite le Statos Unite in un direction
disturbante, verso un cave democratia, ja in effecto
verso le armatura de un dictatura.

In le 1980s e 1990s Robert Parry reveleva multe contos
de Iran-Contra pro le Pressa Associate e Newsweek.

>>>FIN<<<

Traducite per Stan Mulaik.  Le ideas es concordante
con le mie, ben que io pensa que le intention del
author esseva plus insidiose.  Io non es certe si
o non isto es un official del servicio de
securitate de Cuba.  Io ha trovate lo a
soc.culture.latinoamerica. Mais le articulo poteva
esser scripte per un membro del Committee National
del Partito Democratic del SUA, le partito de Al
Gore e Bill Clinton.  Io ha necun sympathias con
le regno in Cuba.