Car amicos,

Io propone de continuar le discussion super iste thema in le coollist.

Io me oppone a Stan Mulaik qui opina que on deberea cambiar (corriger) le
IED. Iste obra de interlingua, como le altere obra basic de interlingua, le
"Grammar" de Gode/Blair, debe conservar su forma original.

Nos constata que le practica de un medie seculo ha monstrate que certe
parolas in le IED non ha le forma toto correcte, que alteres es mal
selectionate, e que mesmo tote un serie de parolas inter crampas quadrate
(non omnes!) e un numero de parolas latin como p.ex. "propter" deberea esser
removite. Io opina que il es sage de inserer tal correctiones non in le IED,
ma in un NOVE dictionario Interlingua-Anglese, que al mesme tempore debe
incorporar le MILLES e MILLES de altere parolas international que plure
interlinguistas ha trovate in le linguas fonte de interlingua.

Il es curiose de constatar que le compilatores del dictionarios de wiki non
profita del LISTA SUPPLEMENTARI, in le qual io ha registrate circa 23 000
parolas international que non se trova in le IED. Io ha facite un tal nove
obra (Woordenboek Interlingua-Nederlands), que es basate super le IED, ma
con circa 50 000 entratas in vice del 27 000 del IED. Io es consciente del
facto que io non jam ha eliminate certe parolas mal selectionate e non jam
ha corrigite alteres. Il es pro iste ration que in le prefacio io ha
invitate le usatores de mi dictionario a signalar me los. Io es toto aperte
a meliorationes de mi labor.

Salutes amical de
Piet Cleij