Stanley Mulaik ha scribite:

>
>Si. Post 1945 illes habeva constatate le regula supplementari que on
>pote cercar altere linguas quando il non ha tres variantes in le
>linguas anglese, francese, italiano, espaniol/portugese. Mais Gode
>non ha usate isto in le caso del particulas. Possibilemente ille non
>habeva bon etymologias del catalano o romaniano.
>
>
On non ha besonio de un etymologia del catalano pro trovar 'aquel'. On
simplemente consulta un dictionario bilingue sub 'that' o 'cette' (o
'celle') o 'aquel'. Le mesme cosa se applica al romaniano. Le idea que
Gode non sapeva que un forma cognate jaceva celate justo preter su
accesso  in le catalano o le romaniano non sona ver. Le probabilitate de
trovar cognatos de un parola in un lingua romance, in altere linguas
romance, es evidente, mesmo al novicio.

Possibilemente le idea de usar linguas romance minor pro extraher
parolas pro Interlingua non le interessava multo. Possibilemente un
prototypo basate super un sol lingua major e duo linguas minor non le
pareva assatis international. Forsan ille considerava un tal parola
minus applicabile in Interlingua que un radice extrahite directemente ex
le latino, un lingua de hereditage international longe e impressionante
e extense, mesmo si celle radice habeva necun cognato in le linguas moderne.

Io dice "possibilemente" nam io non sape. Tamen io crede iste questiones
merita consideration.

A proposito, qual era le reaction de Gode quando tu ha suggerite que tu
voleva cercar cognatos in le catalano e le romaniano e altere linguas
romance minor?

cordialmente
Edo