Car amicos.

Anque io es de accordo con Esteban, Paul LeCorde e plure alteres in le
proposition que le continuation eventual del discussion religiose debe
continuar in un gruppo private e non ci in INTERLNG. In omne caso, es
importante esser tolerante e essayar comprender le argumentos del
contraparte - si on es de accordo o non. Nos ha ja audite multe
argumentos. Io spera que Jay e Paolo vole arguer inter se directemente o
eventualmente crear un lista pro tal discussiones inter interessatos.

Io pote confirmar que Paolo ha durante le passate multe conferentias
sempre presentate discursos super varie themas biblic. Isto non ha
essite servicios divin. Le discursos - cuje textos ha postea essite
publicate - ha essite interessante, e multes ha ascoltate. Le
conferentias ha sempre presentate discursos super multissime themas que
non tracta interlingua (economia, jures, linguas, folklore,
computatores, le pressa, etc., etc., etc.). Le idea es demonstrar le uso
active de interlingua in tante dominios como possibile. Como certes non
apprecia le religion, alteres non comprende le economia o le
computatores, ma le discursos da a illes un chance de apprender qualcosa
nove - si illes desira assister a iste session - e in omne caso audir le
parlatores in interlingua e acquirer un vocabulario plus grande e active
in interlingua.

Del resto, in le conferentia in Focsani anque participava un bahá'ísta
svedo-austriac, Sven Kindestam, e io crede que omnes - credentes o
non-credentes - ha apprendite nove cosas anque ab ille durante lor
conversationes. Como vos forsan sape, le bahá'ístas labora pro un commun
lingua mundial, e ci interlingua naturalmente es interessante.

Con mi optime salutes
Thomas Breinstrup