Superconductores: Material da sperantia de un revolution de energia


Scientistas ha trovate le prime material que exhibi un proprietate multo desirabile al temperatura de camera.

Illo es superconducente, que significa que currente electric flue trans illo con efficientia perfecte - con nulle energia dissipate como calor.

Hodie, multe energia que nos produce se perde como calor a causa de resistantia electric.

Dunque materiales "superconducente" al temperatura de camera poterea revolutionisar le rete electric.

Usque nunc, attinger superconductivitate ha requirite frigidar materiales a multo basse temperaturas. Quando on discoperiva le proprietate in 1911, illo esseva observabile solmente a juxta le temperatura nominate "zero absolute" (-273,15 C).

Desde tunc, physicos ha trovate materiales que superconduce a temperaturas plus alte - mais ancora multo frigide.

Le equipa que faceva iste nove discoperta dice que illo es un grande avantiamento in un cerca que ha jam durate un seculo.

"Debite a le limites de basse temperatura, materiales con proprietates tan extraordinari non ha transformate le mundo talmente que on forsan ha imaginate," diceva Dr. Ranga Dias, del Universitate de Rochester, in le Stato New York.

"Tamen, nostre discoperta rumpera iste barrieras e aperira le porta a multe possibile applicationes."

Dr. Dias adjungeva que superconductores al temperatura de camera "certo pote cambiar le mundo".

In le Statos Unite, retes electric perde plus que 5% de lor energia per le processo de transmission. Dunque tractar iste perdita pote sparniar milliardos de dollares e affice le climate.

Le scientistas observava le conducta superconducente in un composito de sulfure hydrido a le temperatura 15 C.

Tamen, le proprietate appareva solmente a pressiones extrememente alte de 267 milliardo pascales - circa millionuple plus alte que le pression de un pneu. Isto evidentemente limita su utilitate practic.

Dunque Dr. Dias dice que le scopo sequente essera trovar manieras de crear superconductores al temperatura de camera a pressiones plus basse, pro que illos essera economic a producer in un volumine plus grande.

Tal materiales poterea haber multe altere applicationes. Istos include un nove maniera de propeller trainos - como le trainos Maglev que "flotta" super le via in Japon e in Shanghai, China. Levitation magnetic es un tracto de alcun materiales superconducente.

Un altere application esserea electronica plus rapide e efficiente.

"Per tal technologia, on pote prender societate a in un societate superconducente ubi on nunquam plus besoniara batterias per exemplo," dice le co-autor Ashkan Salamat del Universitate de Nevada, Las Vegas.


Secundo BBC News





--
Pro leger le archivos e pro modificar o cancellar le subscription:
http://listserv.icors.org/archives/interlng.html