Anita e Laurie, sia multo benvenite a nostre interlng, e ego* spera que vostre
horas con interlng sempre essera interessante e agradabile. 

Ego es un sene de 62 annos e retirate instructor de svedese a immigrantes
habeva grande profito de interlingua in mi instruction, non assi que ego
inseniava interlingua, non. On me pagava pro instruer le svedese, sed ego
poteva frequentemente usar le radices de interlingua pro explicar parolas
svedese. Mi optime exemplo era _defoliation_ (avlövning) ubi _de_ = av = of;
folio = löv = leaf = ation = ning = ing; Frequentemente ego incontrava
studentes qui (pronomine relative que designa un persona) habeva studiate
anglese e comprendeva le parola _defoliation_ ma non poteva lo ben analysar.
Imagina dunque, que on poterea facer con un plen curso de interlingua! (Ingvar
Stenström pote narrar de isto).

Mi labor era multo interessante. Incontrante humanos de varie culturas e
linguas ego habeva le possibilitate facer cognoscentia con multe linguas e
manieras de pensar. Ego certo apprendeva tanto como mi alumnos! Un multo
interessante experientia. 

* Ego es quasi mi proprie idiolecto. Le parola existe in le IED, marcate in le
mesme maniera como _ma_ e _ci_. Le fracassante majoritate de interlinguanos
usa _io_ e non _ego_. Mi proprie, individual ration pro facer isto es que
_ego_ es como un substantivo disseminate in quasi omne linguas, e viste que
interlingua inter alteres pote esser vidite como un catapulto al vocabulario
commun del linguas occidental (e anque alteres) ego pensa que illo es ben
defensibile, sed le majoritate non pensa isto :-(

Amicalmente

Cellus Purfluvius
(Interlingua pro Kjell Rehnström)