Mi fidantiata Rosana me ha inviate iste articulo via e-posta. Io non sape le
fonte del information pro comprobar su veracitate, ma illo es un curiositate
interessante, assi io lo traduce a Interlingua pro vos.

----------------------------------------------
PROBLEMAS CON LE RETE? PRECA A SANCTE ISIDORO
Vaticano vole eliger le sancte protector del internautas. Le plus quotate pro le
carga es Sancte Isidoro de Sevilia, qui ha vivite in le seculo 6 e amava
encyclopedias.
----------------------------------------------
Le usatores del Internet debe haber tosto un sancte official pro proteger les
del archivos con virus, del lineas telephonic congestionate e del gigantesc
messages de e-mail con propaganda e "catenas"(*) recipite per le rete. Le
Vaticano studia nominar Sancte Isidoro de Sevilia -- considerate le homine le
plus culte del seculo 6 -- le patrono del internautas. Le autoritates catholic
ancora non ha definite si ille sera le electo, ma illes admitte que ille es le
favorito pro le "carga".

Nascite circa le anno 560, Sancte Isidoro ha devenite famose per haber
elaborate, sol, un encyclopedia con 20 volumines. Origines o Etymologias ha
essite create pro reunir tote le cognoscentia del homine usque ille epocha --
concepto que simila le characteristicas actual del rete.

Ultra haber elaborate iste compilation, ille ha scripte super themas tanto
diverse como theologia e historia natural, incarnante le versatilitate del
contentos del Internet, e ha devenite famose per promover debattos inter altere
membros del Ecclesia, in reuniones que simila le foros de discussion disponibile
in le rete de computatores.

Pro completar, Sancte Isidoro ha essite un grande defensor del education, altere
ressource sempre plus exploitate in le Internet.
---
(*) "catenas": messages inutile con recommendationes del typo "invia iste
message a tote le personas que tu cognosce".

Ensjo.