Universalitate:
Io es completemente de accordo que interlingua sia un bellisime candidato
pro le throno universal de linguas.  A vices io pensa al importantia del
travalio propagative que poterea avanciar le causa de iste belle lingua
intelligent, practic, e historic.  A altere vices--forsan durante mi
momentos de perception plus clar--io vide nostre amate interromance como un
parve joiel perdite sur un plagia immense de sablo, conchas , e petras. De
plus, iste plagia existe in un terra cuje inhabitantes non comprehende, non
valuta, e non cerca diamantes.  Anque Esperanto--pro le personas que lo
ama--sia un tal joiel, certemente plus grande, ma in veritate non multo
plus visibile sur le mesme plagia vaste.

In le movimentos linguistic nos sovente exprime le pensata que le interrete
sia un grandissime opportunitate pro le divulgation de iste o ille lingua.
Vermente!  Ma, nos extende iste idea e pensa que le interrete essera, ergo,
le via al universalitate.  Forsan. Mais qui sape?

Disintegration:
Il es anque possibile que le interrete sia un grandissime opportunitate pro
milles de parve linguas a superviver e florar.  Considere nostre proprie
communitate interlinguan hic in le rete.  Nos forma hic un parve
cultura--permitte que io nos appella un "village"--qui supervive per
communication, amicitate, interesse commun.   In le mundo externe--le
plagia immense--parve linguas mori quando le numero de lor parlantes deveni
troppo minuscule.  Illac in le mundo un lingua con solmente cento o mille
parlatores es condemnate a extinction, io pensa.  Mais hic in le rete,
parve gruppos de  vinta o cinquanta pote superviver comfortabilemente  in
lor villages preferite.  Ergo, possibilemente le interrete ha un poter a
reverter le grande tendentia verso universalization e centralization que
pare dominar le tote historia?

A proposito, me place multo le autor Neal Stephenson ("The Diamond Age",
"Snow Crash").  In su visiones del mundo futur le technologia
(communication, nanotechnologia) ha cambiate le modos traditional per lo
que le populationes del terra se organiza.  "Paises" basate sur historia,
lingua, racia, geographia a pena exista.   In lor vice existe "phyles" o
"tribos" o "companias"  de personas vivente dispergite ubicunque sur le
terra, mais cata gruppo con lor propie "principios"
unificante--philosophia, sexo, pecunia, disciplina moral, naturalism,
crimine etc., etc.    Le visiones de Stephenson son multo interessant--e, a
vices, multo comic.

-- frank