Iste fin del septimana io ha preoccupate me con pinger le muro exterior
in mi basamento.  In veritate le basamento de mi casa non es totalmente
subterranee. Le posterior del basamento es realmente plus alte que le
nivello del terra al poterior de mi casa.  Iste muro es coperite con
briccas.  Le facto es que mi casa es super le facie de un collina.

Le ration pro pinger iste muro es proque le fin del septimana previe a
isto, io e mi filio Roberto ha insufflate particulas del celluosa facite
de vetere jornales a in le muro pro insular lo contra le frigiditate
del hiberno. Le celluosa es  un insulator excellente. Mais illo pote
absorber le aqua e perder su characteristicas de insulation.

Pro insufflar le celluosa in mi muro, io debeva incisar cavos circular
al alto del muro inter le traves in le muro. Io e mi filio obteniva un
machina pro insufflar le insulation que Home Depot prestava a nos quando
io comprava le insulation cellulose de illes.  Le machina es effectivemente
un cassa metal con un arbor de "digitos" que torna e pone le insulation
inserite in le cassa in un cavitate ubi un motor electric energisa un
ventilator de alte poter que misce le aere con le particulas del insulation
e suffla lo a in un tubo de 7.5 cm diametro, que porta le insulation al
cavo in le muro e in le spatio in la muro.

Post insufflar le insulation in le muro, io debeva clauder le cavos in le
muro (45 de illos). Mi solution esseva facer parve plancas de ligno,  circa
15 cm x 3.75 x .93 cm. Isto io insereva per le cavo, ubi io centrava lo
in le cavo ante inserer vites o tornillos autoforante per le muro de
planca de gypso (anglese: dry-wall) a cata latere del cavo. Quando
io forava le vites, io teneva le parve planca con mi digitos.  Le vites
mesme trahe le parve planca fortamente al planca de gypso.  Alora, io
reimplacia le disco extracte del muro pro facer le cavo, in le cavo,
super le parve planca, que appoiava le disco.  Io alora forava duo vites o
tornillos per le disco a in le parve planca de ligno pro tener le
disco in su placia in le cavo. Postea io usa le "spackling" pro calcar le
bordo del disco.  Post isto pro cata del 45 cavos, io esseva preste a
pinger le muro.

Le ration pro pinger le muro es non solmente pro facer lo attractive. Il
es necesse a usar un pincto de base oleo pro servir como un barriera al
vapor de aqua in le aere del casa.  In le hiberno le aere del casa es
plus calide que le aere foras le casa, assi le aere in le casa pote
contine plus vapor de aqua, que pote alora penetrar le muro de planca de
gypso ubi il pote condenser se in le insulation, facente le insulation
devenir un conductor del calor in loco de un insulator. Le pincto
non permitte le penetration del muro per le vapor de aqua. Le insulation
alora es secur contra le aqua in le aere del casa.

In le estate, le insulation anque servi pro excluder le calor foras le
casa.  Isto es multo importante in mi location in Georgia.

Isto es plus de mi excursiones in le melioration del casa.  Inter tanto
le Home Depot deveni plus in plus ric de mi compras.  Io es certe que io
ha expendite plus que $1500 iste anno a Home Depot, pro varie cosas in
mi effortios a meliorar iste vetere casa.

Le Home Depot es illo mesme un phenomeno del successo capitalistic. Io non
es le sol comprator de lor benes.  Milles de americanos meliora lor casas
illes mesme.  E ben que il ha longemente habite magazines pro vender le
cosas pro meliorar le casa--le utilos, ligno, plancas de gypso, etc.--
le Home Depot ha facite isto in un nove maniera.  Le Home Depot es
un grande magazin. Le benes es pilate in crude e alte plancas que vade al
tecto.  Le pavimento es crude concrete. Illo es un magazin justo como
lo que alcun affaire usa pro immagazinar su benes.  Isto crea le impression
que on compra le benes in grosso; de facto, le benes es disponibile in
grosso, e le precios es frequentemente plus base que illos del competition.
Le Home Depot es tanto succedite que presto illo va devenir un monopolia
in le affaire de quincalia o ferramentos. Le ration pro lor successo anque
es le grande varietate de cosas disponibile. E illes ha multe empleos pro
adjutar le clientas a trovar lo que illes exige, e a explicar a illes como
a usar los. Iste empleos es illes mesme ex-obreros con multe experientia in
usar le benes. Io es anque secur que le secreto de lo successo es le
comprar de benes in grosso, usar le computatores a registrar le venditas e
ordinar le reimplaciamentos del benes.

Stan Mulaik, pinctor, specialista in insulation, installator de drenos,
   plumbator, e professor.