In non sape le detalios del periodo final de IALA quando interlingua ha
emergite sub le direction de dr. Gode in 1951. Mais io crede que Gode
solmente ha reasserite le direction initiate per E. Clark Stillman in
1939-1943 quando ille esseva le Director de Recerca, e Gode esseva
solmente un nove empleato a IALA. Stillman esseva un esperantista,
con un reputation pro su poesia in esperanto. Mesmo su predecessor
como Director de Recerca, W. E. Collinson, un philologo con un reputation
international como un experto in le philologia del germano, esseva
un esperantista. Mais sub Collinson le recerca ha movite lentemente,
e quando in 1939 il deveniva essential a mover le activitates de
IALA de Liverpool, Anglaterra, a Nove York, Stillman, un assistante
de Sra. Morris in le negotiationes in London e Brussells con
linguistas de repute e active in le recerca a Liverpool, esseva elevate
al position de Director de Recerca in Nove York. Il es importante saper
que Sra. Alice Vanderbilt Morris esseva le benefactrice financial
e fundatrice e gerente de IALA.
In Nove York Stillman ha imponite le politica que ha essite decidite
in previe conferentias de IALA, que le lingua international debe
esser extrahite objectivemente del linguas de Europa, in un maniera
scientific. Pro facer le recerca ille ha empleate solmente linguistas
qui non jammais ha habite alcun association con qualcunque lingua
auxiliar artificial, proque il esseva essential que interlingua non
sia un producto de subjective decisiones mais un reflexion del realitate
externe e commun in le linguas contribuente. Dr. Gode ha dicite que
Stillman non voleva emplear le quando le facto que Gode habeva
laborate pro IALA previemente esseva cognoscite. Stillman non voleva
alcuno in su personal linguistic qui habeva ideas super linguas
artificial. Mais Srta. Helen Eaton, ha salvate Gode, per indicar que
le labor de Gode esseva solmente pro adjutar la in compler su recerca
super le lista de frequentias semantic in plure linguas, que esseva
fundate per IALA. Isto esseva labor professional de un linguista e
non de un inventor de linguas artificial.
Stillman con le adjuta de Gode ha disveloppate un manual pro le
extraction e standardization del vocabulario international in 1943.
Le labor del linguistas super le vocabulario ha sequite le methodos
e technicas describite in iste manual. (Certe minor modificationes e
augmentationes del technique ha sequite post plus experientia in
iste processo de extraher le vocabulario ha incontrate problemas
non anticipate).
In 1943 Stillman ha quitate IALA pro laborar pro le Departimento de
Stato del SUA in le effortia del Guerra Mundial II. Gode esseva
facite le Director temporari del Recerca, e ha continuate le labores
comenciate per Stillman, e in le maniera describite in lor manual.
Quando dr. André Martinet ha essite empleate como le Director de
Recerca, pro dar un nomine famose al effortios, (sub Sra.
Morris) in 1946, ille scribeva un description del effortios que ille
ha trovate a IALA a su arrivata. Ille ha observate que il habeva duo
gruppos al bureau de IALA. Un, sub le direction de dr. Gode, esseva
le gruppo de linguistas, laborante in extraher e standardizar le
vocabulario international in su forma prototypic. Le altere, sub
Sra. Morris e Hugh Blair, su assistante personal, laborava super
designar varie systemas schematic del lingua. Sra. Morris, un
esperantista, esseva influentiate per esperanto, e voleva facer
un lingua similar a esperanto, mais basate super le vocabulario
(con certe simplificationes e regularizationes) como standardizate
per le linguistas. Alcun del systemas inventate per illa e Blair
esseva inspirate per esperanto e ido.
Post su arrivata Martinet ha conducte certe sondages in que le
varie systemas del lingua esseva comparate. Le resultatos ha favorate
un systema intermedie inter le systema prototypic e un systema
alquanto modernizate e regularizate.
Martinet equalmente semblava inspirate in su selectiones de formas
pro le vocabulario per le Radicarium de Edgar de Wahl, le dictionario
de occidental, un altere lingua naturalista schematic. In certe
respectos Martinet semblava ignorar le principios e methodos de
Stillman e Gode e le equipa de linguistas, e io es certe que Gode
non esseva felice a isto. Il es possibile que Martinet ha essite
un adherente de occidental desde circa 1937, ben que ille non ha
revelate iste facto a Sra. Morris e alteres. Nos sape isto per
essayos per Ric Berger, un ex-redactor del periodico de occidental
Cosmoglotta, qui ha adherite se a interlingua.
Il ha un summario de un reunion secrete in Paris in le 8 de junio 1948
con representantes del occidentalistas e idoistas, como L. M. de Guesnet,
(occidental) e Papilon e Aguire (ido), a que Martinet habeva reportate
le progresso de IALA. Martinet ha indicate que le labor de compler un
vocabulario de 5.000 parolas pro un parve dictionario ha vadite lentemente.
De plus ille debeva luctar con le linguistas qui esseva partisanos del
systema prototypic P. Un anxietate in le gruppo esseva que Sra. Morris
voleva facer le resultato como esperanto in loco de un lingua naturalistic.
Al fin de octobre 1948 Martinet ha dimissionate se pro acceptar un
position como un professor al Universitate Columbia in Nove York.
In parte su dimission esseva accelerate proque Martinet voleva
continuar su salario a IALA durante que ille recipeva un salario
al universitate. Isto non esseva acceptabile a IALA (Morris).
Io debe mentionar que desde 1943 dr. Gode habeva laborate como un
regular redactor de obras referential a T. Y. Crowell Compania in
addition a su labores como director del equipa de linguistas.
Justo quando Martinet ha partite de IALA, Gode habeva acceptate un
position in le facultate de Vanderbilt Universitate in Nashville, TN,
SUA. Evidentemente ille non esseva felice que le labor ha deviate
de lineas que ille e Stillman ha disveloppate. Subitemente Sra. Morris
ha venite a Gode con le offerta del position de Director de Recerca.
(Illa habeva necun alternativo. De facto illa esseva mal con le cancere,
e illa esseva facie a facie al prospecto que le projecto de su vita
non esserea complete). Gode ha negotiate con illa que ille haberea
complete authoritate in disveloppar le dictionario final. E ille non
voleva alcun interferentia de illa. Illa ha acceptate su demandas.
Gode, alora ha discargate le productos de Martinet in le direction
de occidental, e ha retornate al principios e methodos de Stillman
e Gode. De facto il jam ha existite un grande vocabulario standardizate
producite per le linguistas. Con su expertise professional in
disveloppar dictionarios, ille esseva capace de finir le Interlingua-
Anglese Dictionario. Mais in parte ille debeva publicar lo con su
proprie moneta, proque in 1950, Sra. Morris ha morite, lassante
necun moneta pro su completion. Le Interlingua-Anglese Dictionario
esseva publicate per Storm Publishers (un compania de Gode) in 1951.
Le final forma de interlingua esseva intermediari inter le forma
completemente prototypic P e le forma modernizate M, como
recommendate per le sondages de Martinet.
Pro plus informationes super le historia de interlingua visita
http://www.interlingua.com/historia.
Stan Mulaik
=====================================================Pro disabonar te del lista, invia un message a
[log in to unmask] con le texto:
UNSUBSCRIBE INTERLNG
o visita le sito del lista:
http://maelstrom.stjohns.edu/archives/interlng.html
=====================================================Visita le sito official del Union Mundial pro
Interlingua:
http://www.interlingua.com/
=====================================================
|
