Victor,
Ben venite a interlingua. Como ha tu apprendite de illo?
Il es melior pro apprender interlingua si tu lo usa. Traduce
alque or crea alque nove.
Ha il focos de silvestres in tu vicinitate? Es le fumo multo
dense? Es le tempore multo calde?
Io habita Marietta, Georgia, USA, que es un suburbo de Atlanta,
Georgia. Io es un pensionate professor de psychologia del
Instituto Georgia de Technologia (Georgia Tech). Io ha inseniate
le statistica e theorias del statistica de probas psychologic.
Io es le autor recente de duo nove libros pro studentes post
graduate, un con le titulo de FOUNDATIONS OF FACTOR ANALYSIS
e le altere con LINEAR CAUSAL MODELING WITH STRUCTURAL EQUATIONS.
(FUNDATIONES DEL ANALYSE FACTORIAL, e MODELLAR DE CAUSAS LINEAR
CON LE EQUATIONES STRUCTURAL).
Io es le presidente del informal Societate American pro
Interlingua, e redactor de nostre periodico, CONFLUENTES.
Io ha incontrate interlingua in circa 1954 quando Dr. Alexander
Gode ha scribite un columna in Science News Letter in interlingua.
Per correspondentia con ille, ille ha devenite mi amico, e io
ha visitate le in Nove York plure vices quando io ha essite al
Hospital pro Veteranos a Brooklyn (suburbo de Nove York) como
un practicante novicio in le psychologia clinic durante sex menses.
In toto, io ha essite un practicante del psychologia clinic durante
4 annos in le Hospital de Veteranos in Salt Lake City, Utah. Post
obtener mi Ph.D. io ha cambiate mi campo de specialization al quantitative
psychologia, con un anno post doctoral al Universitate de Nord
Carolina a Chapel Hill, Nord Carolina. Postea, io esseva un
membro del facultate in le departimento de psychologia in le
Universitate de Nord Carolina durante 4 annos. Alora io ha movite
a Atlanta pro devenir un professor associate a Georgia Tech,
e finalmente un professor, ubi io ha essite fin a 2000, quando
io ha pensionate me. Mesmo alora io debeva inseniar mi cursos
fin a 2005, quando un reimplaciamento pro me ha essite empleate
per le Schola de Psychologia de Georgia Tech.
E que super tu?
Stanley Mulaik
--
Archivos e disabonar: http://listserv.icors.org/archives/INTERLNG.html
|
