Ab EP News (Irlanda)
http://www1.europarl.eu.int/dg3/sdp/tribeur/irl/ir0799t1.htm

LE NOVE PRESIDENTE DEL PARLAMENTO

Pro le prime vice in 20 annos, le Parlamento ha eligite un femina como su
presidente -- Nicole Fontaine.

Un advocata de 57 annos e europarlamentaria desde 1984, Sra. Fontaine ha essite
le clar vincitor, habente obtenite 306 votos, 106 plus que su rival le plus
proxime, Mario Soares, le presidente portuguese anterior.

Sra. Fontaine es un politica de centro in le politica francese e es membro del
Committée Executive del partito politic "Nouvelle UDF". Illa es membro del
Partito Popular Europee (Democrates Christian).

Un del membros le plus active del Parlamento, illa ha executate un rolo eminente
desde 1994 in le Committée de Conciliation que cerca resolver conflictos inter
le Consilio de Ministros e le Parlamento.

Education

In le mesme anno, illa ha devenite le prime vice-presidente del Parlamento. Illa
tamben ha essite membro del committées de Cultura, Affaires Legal e Derectos del
Femina, del Parlamento.

Ante entrar in le Parlamento illa ha passate quasi 20 annos travaliante in le
Secretariato General pro le Education Catholic, de Francia, tractante con
relationes inter le education private e le autoritates public. Illa tamben ha
scribite varie libros, inclusive un guida del citatano al Tractato de Amsterdam.

In su prime discurso al Parlamento como presidente, Sra. Fontaine ha promittite
"esser le presidente de totes" e esser "servitor del [smooth operation] del
democratia parlamentar". Illa contemplava, illa ha dicite, un carga
intimidative.

Su prime deber esserea exiger recognoscentia total del nove responsabilitates
que le Tractato de Amsterdam ha date al Parlamento, rendente lo finalmente "un
Parlamento in le senso real del parola". Illa voleva que le sphera del
procedimento de co-decision (sub le qual Parlamento e Consilio conjunctemente
decreta le leges del UE) sia extendite pro applicar se a tote le elementos del
legislation del Union.

Sra. Fontaine tamben ha convocate le Parlamento a devenir plus involvite in
elementos del activitate del UE tales como le politica commun de securitate e
exterior, decisiones budgetari importante e preparationes pro le Conferentia
Intergovernamental super le reforma del institutiones del UE.

Ultra accentuar le necessitate de un "Commission Europee forte e creative", Sra.
Fontaine ha sublineate le importantia de esser plus transparente super le base
de un nove Codice de Conducta.

Simplification

Le Parlamento mesme non ha escappate del attention del nove presidente. Illa ha
emphatizate le importantia de simplificar su procedimentos e render lo plus
efficiente. Il tamben deberea haber un statuto commun pro le parlamentarios e
lor assistentes. Le Parlamento necessitava esser plus amplemente cognoscite per
le citatanos europee, pro le quales Europa continuava "un concepto abstracte
disconnectite de lor interesses quotidian" e pro le quales Europa esseva un
"machina bureaucratic a pena efficiente".

Finalmente, Sra. Fontaine ha applaudite le appoio que le Parlamento habeva date
a promover le derectos human per le mundo, e ha proponite como su prime
initiativa externe un visita a Kosovo ubi illa poterea apportar le message del
Parlamento de supporto al derectos human e rejection del violentia.

---
Ensjo.