Kjell Rehnström scribeva:
>
> Ensjo, narra nos nordicos del calor! Ci il ha un tenebrositate que es
> interrompite per 6 horas de un poco plus de lumine! Io scribe isto alcun
> minutas ante le hora 8 del matino, e le luce diurne veni - lentemente. Nos
> vive nunc in le Saison Standardizate de Svedia que vacilla inter - 1 e + 10
> grados Celsius. Sempre le mesme, e subito il ha un die de estate, e subito
> il ha un altere die de hiberno, hahahaha!
>
Ben, Brasil es un pais multo grande. Io reside al nord, proxime al linea
del Equator, e ergo durante tote le anno le dies e noctes habe quasi le
mesme duration. Le sol sole levar se circa 6 del matino, e poner se
circa 6 del postmeridie. Le dies habe temperaturas inter 35 e 40 grados
Celsius. De nocte io non es tanto certe, ma io risca dicer alique inter
20 e 25 grados.
Le position geographic ja explica un pauc le calor, ma il ha tamben le
effecto del humiditate del region, a causa del Foresta Amazonic. Belém
non es exactemente INTRA le foresta, illo se localiza justo al delta del
grande fluvio Amazonas. Il ha un altere citate appellate Manaus, le
capital del stato vicin appellate Amazonas, que es de facto in le medio
del foresta. Illac le combination de calor e humiditate es a vices
suffocante!
Nos hic non habe saisones definite in le anno. Le folios del arbores non
cade in le autumno, il non niva in le hiberno. Il ha, in vice, duo
saisones: un pluviose, altere aliquanto plus sic. On sole dicer,
jocante, que il ha duo saisones: un ubi il pluve tote dies; altere ubi
il pluve tote le die. Il ha tamben un fabula super un pluvia que cade
tote dies, circa le 2 del postmeridie, e que personas marca incontros
pro 'ante' o 'post' le pluvia, hehehe.
Un parte de un musichetta:
Eu vou falar com meu bem Io va parlar con mi ben
Depois da chuva que cai Post le pluvia que cade
Todo dia em Belém Omne die in Belém
Ma obviemente le patrono climatic se cambia in altere regiones de
Brasil. Io reside in le Nord. Le Nord-Est es sic in su interior, a vices
aliquanto desertic, ma aggradabilissime in su litoral. Le Sud-Est,
Centro-West e Sud habe omne saisones ben definite. Le Centro-West es
plus sic que le Sud-Est, perque illo non habe contacto con le Atlantico,
e le Sud es -- obviemente -- plus frigide.
--
ENSJO*: EMERSON JOSÉ SILVEIRA DA COSTA
E-mail : [log in to unmask] [<Ø>] Brasil!
Homepage : http://www.nautilus.com.br/~ensjo/
Telephono: (091) 231-5740 // +55 91 231 5740
UIN ICQ : 713833 [* "sj" pronunciate "sh"]
INTERLINGUA - lingua auxiliar international
Info : http://www.interlingua.com
Grammar : http://www.nautilus.com.br/~ensjo/interlingua/english.html
|