Un Sabato a Concord

Ancora un vice io ha oblidate de extinguer mi eveliator le nocte previe.
Dunque io me leva al hora usual - 6.15. Il es inutil de tentar de reindormar
me. Io quita mi sposa qui gaude de un somno plus profunde que le mie e a
passo de lupo io entra in le camera a mangiar ubi se trova mi computator. Io
accende le apparato e attende. Le quattro infantes dormi tanto profundemente
que mi sposa. Le sol exception in nostre menage es le catton de octo
septimanas. Io audi su patetic miaulamentos detra le porta al cucina. Io
aperi le porta e reassedia me con haste pro facer le connection al rete.

La catton se pone in reposo super mi gremio dum le sito 'Hotmail' reporta mi
e-posta. Le messagero instantanee ha jam annunciate que io ha 30 messages.
Io me lecca le labios in anticipation. Subito le lista appare in mi
navigator. Como expectate, le majoritate es in Interlingua ma il ha etiam un
manata in Ido, un par in Esperanto (sin dubito re le nove sito que io ha
construite pro le UEA) e un singule in Occidental. Le ronronada del catton
sembla augmentar quando io vide le nomines amical e familiar - Stan, Kjell,
Chris, Jay, Piet, Ensjo, Alyssa. Io commencia a leger.

Circa septe horas mi filio de cinque annos appare, strabe a causa del lumine
matinal que innunda le camera, e grattante su capite blonde. Io le imbracia
e ille prende le catton. Isto es le excambiamento usual. Ille reguarda le
aventuras del koala 'Blinky Bill' a television dum io explora le frontieras
del construction de parolas in Interlingua con Stan e Allan.

Dece-cinque minutas passa in tranquillitate. Tunc, in succession rapide le
altere infantes parada lor pyjamas ab lor cameras usque varie punctos in le
domo. Un del geminas de dece annos da a mangiar al catton dum l'altere
commencia designar un carta pro su granmatre paternal. Deman es le 'Die del
Matre'. Mi filietta de tres annos pulsa su pupa in un parve ambulator que
supporta etiam tres assatis grande saccos plen de su tesoros. Il ha un sacco
pro le vestimentos de ballet (hereditate del sorores senior), un sacco pro
le cosmetica e un altere plen de billetes ferroviari antiquate e monetas de
un o duo centes. Super le scabello del piano illa estable un boteca e con un
amica immaginari, vende e eme su proprie tesoros. Io audi le 'toc toc toc'
de su scarpas plastic a stiletto alte dum io corrige un ligamine in le sito
de UEA.

A septe horas e trenta io audi le voce de mi sposa. "Non oblida le sporte,
Edo!"

"Ha si... le netball pro le geminas e le football pro mi filio," io me
rappella. Hodie io conduce le a un suburbio lontan pro un match que
commencia a novem horas. Io claude le navigator, extingue le computator e
entra a saltos le camera de banios. Si io pote navigar le Tela, certo io
pote navigar le itineres labyrinthian de Sydney, io pensa.

A esser continuate...

Edo

________________________________________________________________________
Get Your Private, Free E-mail from MSN Hotmail at http://www.hotmail.com