Novemente io es surprendite per le coincidentias del vita...

Como in ille vice quando Stan voleva saper le termino in altere linguas
pro "pollinization cruciate" e, spectante TV, ecce que le termino me
cade super le gremio, novemente alique similar me succede.

Post poner le e-littera super RPG heri, quando io quitava le travalio e
passava in un banca de revistas, io trova le revista de RPG que io
compra mensualmente: "Dragão Brasil" (le "a~" appare ben ora?), e ecce
que il ha un littera de un lector super le personas qui reguarda le RPG
como un cosa demoniac.

Hic infra seque le traduction.

--
REVISTRA DRAGÃO BRASIL #25
SECTION "PERGAMENAS DEL LECTORES"

JOCO DEL DEMONIO

Car Katabrok [iste es le cognome del persona qui responde le litteras],
infelicemente ni toto es festa...

In le section "Dicas ["dica" in portugese es un parve consilio utile que
un persona experiente da a un persona minus experiente. In Interlingua?]
de Maestro" del DB#12 on diceva que le RPG non es ben viste per alcun
entitates. Io pensa que alcun jocatores collabora un poco con iste mal
conception.

Un ecclesia hic in Rio poneva un immense placardo in su entrata
principal, explicante que le AD&D ["Advanced Dungeons & Dragons", un
famose titulo de RPG, producite per le TSR statounidese] duceva al
satanismo e al magia nigre, que illo era un joco perverse, veniente ab
le demonio. Nihil pote esser plus false! Io ipse ha essite reguardate
como un typo de antichristo, solo perque io joca e es Maestro de AD&D!

Ma le pejor veni ora: io veniva a saper que in le Castelinho do Flamengo
il ha essite prohibite jocar RPG, a causa de certe jocatores
inconveniente. Conclusion: nos perdeva un importante spatio pro
reuniones, jocos e eventos, toto per culpa de alcun jocatores
irresponsabile. A causa de un manata, multos debe pagar.

Pro "adjutar", alcun ecclesias non comprende ben le RPG e remane a
diffamar lo. Io pete que DRAGÃO BRASIL continua a divulgar le RPG (como
jam lo face) e reprime jocatores qui macula le imagine de lor proprie
hobby. Qui sape nos poterea facer un campania national pro
"dismystificar" le RPG?

VINÍCIUS REIS DE SOUZA, RIO DE JANEIRO - RJ
--

Ver, Vinícius. Le problema existe. Alcun annos retro, il habeva casos
plus seriose de ecclesias contra le RPG in le SUA.

Existe le famose scandalo del puero qui jocava AD&D e se ha suicidate;
le familia accusava le TSR, pois "ille joco demoniac habeva occidite le
paupere puero". Le caso arrivava a inspirar le film Mazes&Monsters, con
Tom Hanks. Lo que necuno mentionava es que le puero in question jam
presentava problemas mental e depressive ANTE cognoscer RPG.

In Brasil, usque ora necuno ha morite "a causa de RPG", ma nonobstante
alcun cultos predica que le AD&D es un joco maligne. Que illes dicerea
alora de titulos como Vampiro, Call of Cthullu, Ars Magica, Wraith o
Arkanun [titulos de terror]?

Ma ni toto es contra le RPGista. Cata vice plus maestros e pedagogos
recognosce le joco como intertenimento salutar e mesmo un forma de
cultura, assi como le revistas in designos. Le ipse historias in
designos habeva lor momento de "villania", in 1954, quando Fredric
Wertham publicava su libro "Seduction of the Innocent", que ha provocate
un cremation de revistas in placia public, como in le tempore de chassa
al magas. Ben, ille populo non habe argumentos rationabile. Que illes
remane a maledicer in su templos, cremante cartas de personas e datos de
vinti facies...

A causa de istes e alteres, tote le jocatores debe vigilar super le
imagine del RPGista. Quando le Paladino [un articulista del revista] vos
enoiava con codices de conducta pro jocatores, regulas de securitate pro
live-actions ["live-action" es un modalitate in le qual le jocatores se
vesti de accordo con su personas e face quasi un theatro] e ethica pro
jocos de tabula [iste es le forma plus usual, super un tabula, usante
datos, stilo e papiro], ille non era "paladino enoiose" -- solo caute,
perque ille sapeva multo ben le grandor del problema!

Il es vermente un pena que on non pote plus jocar in le Castelinho do
Flamengo, ma forsan assi le jocatores (ir)responsabile pensa un poco.
Bon senso e responsabilitate es importante, non solo in RPG, ma in toto.

Si il dependera de nos, nos non desistera de divulgar e explicar le bon
e vetule RPG, usque que on cessa a appellar lo "joco de folle".
-- 
   ENSJO : EMERSON JOSE' SILVEIRA DA COSTA
  E-mail : mailto:[log in to unmask]
Homepage : http://www.nautilus.com.br/~ensjo/
Addresse : Conj. Panorama XXI, Q. 26, C. 14
           Nova Marambaia
           66625-280 Belem - Para - Brasil
Telephono: (091) 231-5740 // +55 91 231 5740