Car participantes in INTERLNG!

INTERLNG ha un importante position pro interlingua. Le foro electronic
ha causate un vivide activitate IN interlingua. Illo ha essite le prime
contacto de multe nove interessatos con interlingua. Interlinguistas
"professional" ha adjutate multo per dar lor benvenita al nove nomines
e initiar correspondentias private con illes. INTERLNG ha inspirate le
nove interessatos a osar scriber interlingua - multes ha scribite lor
prime phrase in interlingua in un foro de expertos sin timer "le penna
rubie"! Isto es vermente un raritate. E un tal nos debe guardar.

Ecce alcun observationes que le subsignatores ha experite:

* INTERLNG ora contine un grande quantitate messages re questiones
academic de linguistica. Usualmente concernente detalios sin interesse
commun. Alcun tal messages plus sovente sembla monologos que
contributiones in un discussion.

* alcun membros ha terminate lor subscription pro iste causa.

* alcun membros consequentemente dele messages sin leger los post ha
vidite qui es le autor.

* plure membros ha devenite multo irritate super messages a singule
personas inviate a INTERLNG. Exemplos es pur interjectiones o messages
del typo "Io es de accordo con te".

* Nos ha a vices vidite messages de personas qui ha trovate iste
situation presente como quasi provocative. Concurrentias academic pote
trovar altere foros.

* Quando INTERLNG ha startate plure comenciantes ha scribite essayos in
illo. Un novice qui lege INTERLNG hodie es securmente discoragiate.

Un extracto del scopo de INTERLNG:

"* Le objecto de iste liste
*  es provider un foro pro USAR le lingua. Le intention principal
*  non es discussiones SUPER Interlingua ma discussiones IN
*  Interlingua super themas varie. Nonobstante, isto non vole
*  dicer que tal discussiones super Interlingua non sia benvenite.
*  Nos spera que interlinguaphonos a qualcunque nivello sentira se
*  benvenite.  Il debe esser evidente que necuno parla interlingua
*  como lingua materne. On pote semper meliorar se.  Ergo, omne
*  participante in iste gruppo intende semper communicar con un
*  spirito de patientia, cooperation, e amicitate."

Nos subsignatores exhorta le participantes

* a respectar le scopo

* a inviar messages a personas PRIVATE quando il se
non tracta de information al bon parte del participantes

* a leger TOTE messages ANTE on comencia responder a singule messages.

* a startar foros special pro themas que non conforma al scopo de
INTERLNG, si on desira tractar tales. Il ha plure possibilitates a
startar tal foros gratis - p. ex. in Deja News e Delphi. Totevia nos
NON desira innecessarimente FRAGMENTAR le communication inter
interlinguistas!

* Nos anque exhorta le "list manager" a interferer quando ille observa
conductos non in harmonia con le scopo general.

Nos assi gaude a participar - plus o minus activemente - in INTERLNG
anque in le futuro.

Allan Kiviaho    Thomas Breinstrup    Sigmund Löfstedt
Steinar Midtskogen    Jan Årmann

--
Jan Årmann/Jan Armann
Generalsgatan 12 E; S-903 36 UMEÅ/UMEA, Sverige (Sweden)
Tel & Fax +46 (0)90771525; e-mail:
[log in to unmask];
[log in to unmask];
[log in to unmask];
ICQ - UIN nr:785745;
http://www.algonet.se/~armann