Kjell e le manifesto.

Si, Gode scribeva como un fugue de Bach, puncto e contrapuncto. Le lector
es semper imbalantiate, presentate con le inexpectate.

Mais si vos pote passar su stylo unic de scriber, on va vider in le
Manifesto que ille argue que interlingua non esseva determinate secundo
le variables importante al esperantistas.  Illo esseva determinate sin
alcun considerationes de qual uso illo va haber.  Ric Berger diceva
que Gode ha contate como Stillman habeva empleate le e le altere
linguistas a IALA solmente si illes habeva necun experientia prior con
un lingua auxiliar.  Lor scopo non esseva a inventar un lingua, mais a
constatar lo que esseva le vocabulario international in le linguas
europee e a standardizar lo secundo le idea del prototypos.  Assi on
pote considerar interlingua como un cosa jam existente, revelate
in un forma objectivemente standardizate. A ver dicer, illes ha
discoperte un systema schematic in le serie derivational de milles de
parolas, e illes ha mesmo standardizate lo, que introduceva alcun
schematicismo e regularitate.  Mais le resultato esseva ancora
natural e familiar.  Totevia le essentia de interlingua es que illo
es definite per le realitate de similar parolas e affixos in multe
linguas.  Considerationes de facilitate, simplicitate, schematicismo
es irrelevante al determination de lo que es interlingua.  Mais le
cosa meraviliose es que illo es facile, simple, e schematic, mais
naturalmente. E iste face interlingua bon pro servir le populos
europee como un lingua auxiliar, como un registration de lor heritage
lexic commun.

Stan Mulaik