Car Interlinguistas reunite in Focsani,
con le disveloppamento del Internet e
le uso de communicationes international
pro medio del eposta (email), il es
possibile traher ante vos pensamentos
pro consideration... si vos ha tempore
durante le intermissiones, inter le
bon e belle discussiones public que
ha essite organisate pro vos... Hic in
le Statos Unite nos ha questiones que
preca un responsa serie e quasi alsi
urgente.

Nos in le Statos observa nunc le
dissolution de nostre Interlingua
Institute... Si, al prime de augusto de
iste anno. Isto significa que le sonios
del ultime director de IALA pro un
organisation representative del
belle lingua international non vivera
plus ultra del nove millenio... de facto
illo morira ante del alba del proxime
centennario, un marca chronologic
tanto pivotal como iste non deberea
presentar tal obstaculo al
disveloppamento pro publicitate e
augmento de interesse in nostre
amate vehiculo de communication
international.

Ecce le necessitate pro discussion
serie e urgente. Le nove millenio es
a minus de cento sexanta dies de
distantia e con illo venira le silentio
de non haber un entitate national hic
in le Statos pro representar le membros
del movimento international pro le
belle lingua auxiliar. Nos americanos
nunc fixa nostre oculos a vos... car
amicos pro adjuta. Qual esserea le
melior solution a nostre problema?

1. Aperir un nove bureau pro le disemination
de materiales pro publicitate hic in le Statos?

2. Injectar vita al vetule Interlingua Institute?

3. Lassar que omne effortios pro augmentar
le causa del belle lingua auxiliar essea mantenite
per le organisation international, UMI, o alcun del
organisationes national ja in existentia?

4. Oblidar le situation e sperar que alco veni depost
le nove anno e post un tempore pro rumination de
iste predicamento?

Tunc, pro prestar le parolas del vetule poeta...
"Esser o non esser iste es le question" e nos
poterea adder... "Tomar action o non facer alcun
cosa"... que pensa vos, amicos, que nos suggere
vos? Nunc il ha representante in Focsani que veni
de nostre costas... que sape de nostre situation...
per favor, si vos ha tempore pro serie discussion
e offerer adjuta nos hic attende vostre responsas.

Sincer e amicalmente,
Jay Bowks,
Keene, New Hampshire.
[log in to unmask]