Car amicos,

Le sabbato e le dominica passate io ha reguardate le television durante multe
horas pro vider le campionato mundial de sprint pro patinatores in le
patinatorio coperte de Berlin. Iste torneo esseva meraviliose con duellos
magnific inter le melior patinatores del mundo. Finalmente le decision ha
venite in le ultime cursa del 1000 metros inter le canadese Wotherspoon e le
nederlandese Jan Bos. Iste juvene nederlandese ganiava le cursa in le tempore
phantastic de 1.11.10 ante su rival con 1.12.28. Jan Bos es dunque le campion
mundial de 1998, un grande honor. Con su amico Erben Wennemars, qui
occupa le tertie position in iste campionato, e con altere grande patinatores
nederlandese, Jan Bos va participar in februario al jocos olympic hibernal in
le urbe Nagano.

Mi interesse in le patinage de velocitate data desde le prime annos de mi vita.
Jam durante plus de 30 annos io es un del directores de mi club local de
patinage, que ha un grande numero de membros enthusiastic. Il es regrettabile
que iste hiberno le temperaturas esseva troppo alte, de sorta que patinar super
glacie natural non jam es possibile. Iste anno nostre patinatores es ancora
obligate de exercer lor bellissime sport in le grande patinatorio coperte in le
urbe Utrecht que es proxime al suburbio De Bilt (Bilthoven) ubi io habita.

Salutes amical de Piet