[ Martin Lavalle'e ]
Ubi son le ecclesias christian qui comprende le message real del
christianismo, a saper le unitate essential del humanitate?  Ubi iste
message es clarmente proclamate e le racismo sin ambiguitate condemnate?
Pro quo christianos de diverse brancas, per exemplo inter catholicos e
protestantos, itero battalia se in alicun paises? Pro quo le pace
mundial es un thema quasi paradisiac quando illo es un del conditiones
de un vita vermente christian?  Il me sembla que Bahá'u'lláh, tra su
vita dolorose, monstrava le essentia del fide personal vidante in cata
humano speculo de Deo e non un specie de blancos o nigros o rubios, como
se-dicente christianos crede in movimentos racista (KKK ergo gratia).
Tal juste reinterpretationes gratias a Bahá'u'lláh del credos semper
revenira e es necessari, nam le homines multo ama facer bellos a partir
de detalios tote van e chimeric.
[ Frank Pfaff ]
Car Martin, tu pone un serie de questiones super "christianitate" que
evelia in facto le question super lo que, in veritate, es (o non es) iste
cosa "christianitate". Malgrado le facto que io es "christian" io volerea
dicer que, pro me personalmente, le terminos "christian, christianitate,
christianismo, etc." son semanticamente problematic.  Post duo mille annos,
durante que le parola "christian" ha essite usate in le plus varie manieras
e circumstantias, io non es sicur que il es possibile discuter usante le
parola "christianitate" effectivemente.  Si io dice a alcun, "Io es
christiano", alora io non sape lo que ille comprehende super me.  Pensa
ille que io es un gentile qui va omne dominica a in le ecclesia. Pensa ille
que io es un credente in Jesus?  O, como tu scribe, pensa ille que io
poterea esser membro del KKK?  Alora, pro me, le nomine "christian" non
importa multo. "Christianitate" (como nomine) non importa multo.

Le centro de "christianitate" es Jesus. Ma Jesus ipse non era un
"christian", sed un judeo. Etiam omne discipulos de Jesus era judeos.
Durante le prime seculo, le admission del prime gentiles (non-judeos) al
nove credentia era pro le discipulos judee un novitate surprendente e
difficile a acceptar. Vermente, iste credentia in Jesus es un cosa judee,
basate in judaismo, basate sur scripturas compilate durante 1500 annos del
historia judee. Iste scripturas del judeos revela un unic Deo Qui creava
universo, terra, vita, e humanitate. Illos conta le historia tragic de
humanitate, nostre peccato e rebellion contra le Creator, e le perdita como
consequentia de nostre relation intime e amical con Ille. Ma,
interessantissimemente, le scripturas revela anque un longe serie de
promissas connectite, que parla de un salvation de humanitate. Iste
salvation serea accomplite per un persona magnific e mysteriose, qui
venirea a Israel pro esser su Rege, Propheta, Alte Prestre, Magister, e
Salvator. Le titulo special de iste persona era "messia" (hebreo =
maschiach, greco = christos).

Le homine Jesus que nos cognosce (hebreo = Ieshua) viveva le vita de un
judeo simple in le obscuritate del village Nazereth in Galilea durante le
prime seculo. In le anno 27 ille comenciava un carriera public que durava
solmente duo annos. Durante iste curte tempore ille inseniava bonitate,
predicava pardono, sanava malades, annunciava salvation a Israel, assereva
que ille era le Filio de Deo, e realisava plus que tres centos del
profetias biblic super le Messia promittite. Ille attraheva le populo
ordinari ma alienava le estabilimento religiose e le autoritates secular.
Istes lo livrava al administration roman que lo occideva cruelmente. Su
amicos fugiva in confusion. Le matino del tertie die post su interramento
su tumba non plus contineva su corpore. Tosto postea, su amicos videva lo
resurgite. Essente convincite de su resurrection ex morto e que Ille era in
veritate le Messia promittite, e reimplite de confidentia e poter per le
Spirito Divin, illes comenciava divulgar iste "novitate bon" con grande
fortia.  E usque nostre dies le flamma de iste fide arde ancora per le
mundo.

Iste eventos del prime seculo era le prime visitation messianic. Usque
hodie nos "messianicos" expecta Su visitation secunde e final. Le sperantia
"christian" (o "messianic") es "viver in relation intime e personal como
infante del Creator". Creder in Jesus es creder que Ille vive e acceptar
Ille como Rege, Propheta, Alte Prestre, Magister, e Salvator.

Amicos, pardona per favor mi longe essayo a responder al questiones de
Martin, ma io non trovava possibile explicar "christianitate" sin presentar
le persona de Jesus. Sin le persona de Jesus, "christianitate" es un NIHIL
absolute. Martin demanda, "Ubi son le ecclesias christian...?"  Il es
necessari facer hic distinction inter "le ecclesia" de Jesus e le varie
"organizationes ecclesiatic" como Ecclesia Catholic o Ecclesia Coptic o
Ecclesia Presbyteriano etc. "Le ecclesia" de Jesus es le collection de
personas qui accepta SU relation intime e personal in Deo. Ubicunque il ha
cordes human qui accepta le Messia/le Christos, illac se trova "le
ecclesia" messianic/christian.  Ubicunque es trovate le terminos
"christian" o "christianitate" ma NON es trovate cordes apperite al persona
de Jesus, illac NON se trova Su "ecclesia". Ma nos non es permittite
"judicar" super qual cordes o qual personas son "christianos" o non. Jesus
diceva, "Io cognosce le mies e le mies cognosce me."  Alteremente dicite,
"Ubi es le ecclesia?" Responsa, "Deo sape e le membros de Su ecclesia
sape."

Alora, in conclusion, permitte me a asserer brevemente que "le message real
del christianismo" NON es "a saper le unitate essential del humanitate".
Le message real es ille "novitate bon" que incendia durante vinte seculos
cordes human--"Le MESSIA ha venite!"  Le message real del christianismo es
le PERSONA IPSE DE IESHUA HAMASCHIACH.

Que TU pensa qui es Jesus? Si tu non es SICUR, esque tu es satisfacite in
permitter que tu vita vade al fin sin un incontro con Ille?

Messianicamente,
-- frank