LE NOVE MONETA DEL VETULE MUNDO
Dece-un paises de Europa face debut con le euro, le moneta que vole batter
le dollar.
(Per Fernando Valeika de Barros, de Paris)
Nos, brasilianos, es ja callose. Mais, pro le europeos, le cambio de moneta
que occurre ora es le evento del seculo. Desde 4 de januario, il es le euro
que vale in le transactiones financiari de dece-un nationes del Vetule
Mundo. Per ora, solo bursas e bancas essera obligate a travaliar con illo.
Le farce del cartiera del consumitor comencia a cambiar solo in januario de
2002. Sex menses postea, franco, marco, lira, peseta e alteres habera
disparite. Tu ja ha imaginate?
Le euro ha essite le maniera trovate per le dece-cinque paises-membros del
Union Europee pro confrontar le dollar, usate hodie in 50% del
transactiones commercial in le mundo. In ricchessa, le paises del
eurolandia equipondera le Statos Unite. Le nova moneta va stimular le
economia del dece-cinque e sparniar devisas in le cambio. Hodie, si tu
passava per tote iste nationes in un viage, tu perderea quasi 40% de tu
moneta in conversion. Illo vole dicer que, in 2002, il devenira multo plus
facile e incostose fruer de ferias in Europa.
Pro le europeo, il valera le pena mesmo saltar frontieras solo pro facer
compras, viste que il ha grande differentias de precios inter un pais e
altere. Pro un refrigerator, crede tu, on paga in Germania 147% plus que in
Finlandia. "Le exposition del disparitate debera attisar le competition e,
on spera, plus tarde diminuer le precios", diceva le economista Boris
Durande, consiliero del Union Europee in Paris.
Le avantages habera lor precio. Mesmo machinas de bibitas debera esser
ajustate. E, in le initio, le nove pecunia va incommodar un massa de gente
accostumate al monetas centenari. Le italiano, per exemplo, debera divider
le precio del pizza per 1.933,64 pro saper quanto illo vale in euro. Ille
va objurgar multo ante regalar se con le cancellamento de zeros in su
contos.
Pro render gradual le impacto sur le quotidiano del 291 milliones de
habitantes, contos, extratos de movimento bancari e facturas de soldo
comencia a apportar, desde ja, le amontas exprimite tamben in euro. In
2002, forsan le europeos ja succedera a ir al compras sin portar le
calculator. Per ora, Illes face como le brasilianos face quando le moneta
cambiava hic: illes alterca e spera que, al fin, toto resulta ben.
---
SYMBOLOS SIN POSSESSOR
Le notas essera equal pro totes.
Le notas apportara portas sur un facie e pontes sur le altere, totes
imaginari. Le monetas habera fronte commun e dorsos differente pro cata
pais.
FINLANDIA
Moneta: marca
1 euro = 5,93 marcas
Dorso del nove monetas: anseres
GERMANIA
Moneta: marco
1 euro = 1,97 marcos
Dorso del nove monetas: aquila
HOLLANDA
Moneta: florino
1 euro = 2,21 florinos
Dorso del nove monetas: regina Beatrice
IRLANDA
Moneta: libra irlandese
1 euro = 0,76 libras
Dorso del nove monetas: harpa
PORTUGAL
Moneta: escudo
1 euro = 201,22 escudos
Dorso del nove monetas: cruce del Ordine de Christo
FRANCIA
Moneta: franco francese
1 euro = 6,58 francos
Dorso del nove monetas: motto "Libertate, Equalitate, Fraternitate"
ESPANIA
Moneta: peseta
1 euro = 166,38 pesetas
Dorso del nove monetas: rege Juan Carlos
AUSTRIA
Moneta: shilling austriac
1 euro = 13,89 shillings
Dorso del nove monetas: Amadeus Mozart
ITALIA
Moneta: lira
1 euro = 1.933,64 liras
Dorso del nove monetas: obra de Leonardo da Vinci
BELGICA
Moneta: franco belga
1 euro = 40,63 francos
Dorso del nove monetas: rege Alberto II
LUXEMBURG
Moneta: franco luxemburgese
1 euro = 40,63 francos
Dorso del nove monetas: grande-duc Jean
Grande Britannia e Danmark, suspiciose, se ha refusate a adoptar le euro
ja. Grecia e Svedia ha essite reprobate in le regulas, que es le sequente:
deficit public minor que 3% del PNB; debita minor que 60% del PNB;
inflation de usque 2,7%; interesses de usque 7,8%. Le quatro paises
adherera plus tarde.
---
Traducite de REVISTA SUPERINTERESSANTE, Anno 13, Nš 1, Januario 1999 per
Ensjo.
|
