Que le feminas me pardona! Io recipeva isto per e-posta e lo traduce ora a
Interlingua. :-)

--
LE 5 PEJOR QUESTIONES DEL FEMINAS AL HOMINES -- E LOR RESPONSAS

1) "A que tu pensa ora?"
2) "Tu me ama?"
3) "Es io corpulente?"
4) "Tu la trova plus belle que io?"
5) "Que tu facerea si io morirea?"

Lo que face iste questiones tanto mal es que illos certemente explodera in un
discussion interminabile o mesmo in divorcio si le homine non los respondera
correctemente, que es le mesme que dicer "dishonestemente". Per exemplo:

1) "A que tu pensa ora?"

Le responsa correcte, claro, es "Excusa me pro esser pensative, cara. Io
simplemente reflecteva super quanto tu es gentil, meraviliose, caressose,
servicial, intelligente e belle, e super quanto io es fortunate de haber te
incontrate!" Obviemente iste affirmation habe necun similitude con illo que le
individuo de facto pensava, que probabilemente debe esser un de iste cosas:

a) Football.
b) Auto.
c) "Tu es tanto corpulente!"
d) "Illa es multo plus belle que tu."
e) Que ille facera con le moneta de tu securitate si tu morira.

De accordo con le articulo, le melior responsa pro iste question stupide veniva
de Al Bundy, de "Married with Children", quando illo le esseva facite per su
sposa Peg:

"Si io voleva que tu lo saperea, io lo parlarea in vice de pensar lo."

Le altere questiones tamben habe un unic responsa correcte, ma inumere responsas
incorrecte:

2) "Tu me ama?"

Le responsa correcte es "Si". Pro illes qui apprecia alco plus elaborate, illo
poterea esser "Si, cara". Alcun responsas incorrecte:

a) "Io pensa que si."
b) "Tu te sentirea melior si io te dicerea que si?"
c) "Il depende de lo que tu vole dicer con 'me ama'."
d) "Qui, io?"
e) "Io pensava a tu polissa de securitate."

3) "Es io corpulente?"

Le responsa correcte a iste question es un emphatic "No, claro que non", e in
sequentia exir del sala. Alcun responsas incorrecte:

a) "Io non dicerea 'corpulente', ma tamben tu non es magre."
b) "Comparate con que?"
c) "Alcun kilettos in ultra resta ben in te."
d) "Io ja videva feminas plus corpulente."
e) "Io pensava a tu polissa de securitate."

4) "Tu la trova plus belle que io?"

Le "illa" del question pote esser un ex-inamorata, un puera qui passava per le
strata e a qui tu reguardava tanto insolentemente que tu quasi causava un
accidente, o alora un actrice de un film que tu veni de vider.

In qualcunque caso le responsa es "No, tu es multo plus belle". Alcun responsas
incorrecte:

a) "Non plus belle, simplemente belle in un altere maniera."
b) "Io non comprende como on pote classificar tal cosas."
c) "Si, ma tu personalitate es plus marcante."
d) "Solmente in le senso que illa es plus juvene e plus magre."
e) "Io pensava a tu polissa de securitate."

5) "Que tu facerea si io morirea?"

Responsa correcte: "Mi amor, in le eventualitate de un tal evenimento
impensabile, le vita non haberea plus senso pro me. Io me jectarea sub le prime
betoniera que passarea." Iste debe esser le question le plus stupide del cinque,
e illo es ben representate per iste burla:

-- Caro -- dice le sposa. -- Que tu facerea si io morirea?
-- Cara, io restarea extrememente mal -- dice le marito. -- Perque le question?
-- Tu te maritarea de novo? -- insiste le sposa.
-- No, claro que non -- responde le marito.
-- Le vita de marito non te place? -- illa questiona.
-- Certemente me place -- ille responde.
-- Alora perque tu non te maritarea de novo? -- illa inquire.
-- OK -- accorda le marito. -- Io me maritarea de novo.
-- Tu te maritarea? -- dice illa, vagemente resentite.
-- Si -- diceva le marito.
-- Tu dormirea con illa sur nostre lecto? -- dice le sposa post un pausa.
-- Ben, io pensa que si.
-- Ben -- dice le femina indignate. -- E tu la lassarea usar mi vestes?
-- Io crede que si, si illa lo volerea -- dice ille.
-- Hmmm -- dice illa glacialmente. -- E tu tirarea mi photos del portaphotos e
ponerea le sues?
-- Io suppone que isto sia le cosa correcte, nonne? -- responde ille.
-- Solo illo? -- exclama illa, ja saltante del sedia. -- E io suppone que tu la
lassarea jocar golf con mi fustes, tamben?
-- Claro que non! Illa es sinistromane!
--
   ENSJO : EMERSON JOSÉ SILVEIRA DA COSTA
Homepage : http://www.nautilus.com.br/~ensjo/
 UIN ICQ : 713833

INTERLINGUA - lingua auxiliar international
    Info : http://www.interlingua.com/europa/queesinterlingua.html
  Brasil : http://www.nautilus.com.br/~ensjo/ubi/