Si, amicos. Norvegia ancora vive in le Cuppa del Mundo de 1998 a Francia, post parer destinate al defaite post un goal marcate per Brasil,13 minutas ante le fin del secunde tempore...

Norvegia jocava defensivemente, con formation 4-5-1 (4 al defensa, 5 al medio-de-campo e 1 al attacco). Lor tactica pro le joco contra Brasil era remaner in defensa e tentar marcar goals in contra-attaccos veloce. Le 9 prime jocatores remaneva tanto cohese in le defensa que on quasi poterea dicer que lor formation era 9-1-0. :-)

Brasil ipse jocava pessimemente. Durante le majoritate del tempore on spectava un joco lente e enoiose ubi Brasil habeva le possession del bolla, ma non succedeva trovar spatios pro penetrar le muralia norvegian. Le bolla passava ab jocator a jocator in le medio-de-campo, sin objectivitate. Le jocatores insisteva in attaccar per le medio, ubi il habeva un mar de gambas norvegian, e illes perdeva le bolla. Con un tal barriera, le option le plus obvie serea explorar le laterales del campo, lo que rarmente succedeva. Quando Brasil habeva le opportunitate de un contra-attacco, le equipa non succedeva partir como un toto verso le goal norvegian... Aliquando Norvegia succedeva menaciar le goal brasilian in su contra-attaccos, que fortunatemente era dismontate per nostre defensa.

Assi se passava le prime tempore e le initio del secunde, quando finalmente BEBETO succedeva marcar le prime goal pro Brasil.

Ma le allegria brasilian durava pauco. Animate per le prime goal, le equipa se disconcentrava e, alcun minutas depost, in un contra-attacco, TORE ANDRE FLO succedeva mitter le bolla inter le gambas del defensor JUNIOR BAIANO e restava vis-a-vis con le goalero TAFFAREL, qui non succedeva evitar le goal.

E ecce que quasi al fin del joco, le arbitro indica un dubitose falta de defensa intra le area brasilian e declara PENALITATE MAXIME (penalty) contra Brasil. Nove goal pro Norvegia. Non plus de tempore pro un reaction brasilian, e le joco termina con Norvegia 2x1 Brasil. Con le victoria, Norvegia se classifica pro le secunde phase, rendente inutile le belle victoria de MOROCCO, in le altere joco del gruppo A, de 3x0 contra SCOTIA.

Ora Brasil, con manco de credibilitate, confrontara CHILE in le prime joco del phase eliminatori, le sabato. Norvegia confrontara ITALIA, leader del gruppo B. Si Norvegia e Brasil habera sorte, illes se incontrara novemente in le joco final del Cuppa.

Al minus Brasil perdeva quando illo POTEVA perder, perque su classification era ja garantite per le duo victorias anterior. Io spera que illes succede corriger le multe problemas ancora restante... e tosto! :-(

Discontentemente,
Ensjo.