Subject: | |
From: | |
Reply To: | |
Date: | Sun, 5 Oct 2008 01:21:28 +0200 |
Content-Type: | text/plain |
Parts/Attachments: |
|
|
Car omnes,
Con un amica mie, io ha essite invitate a facer un discurso a un
conferentia super autismo in le citate de Porto, Portugal, organisate
per APPDA-Norte* pro le 24 e 25 de octobre.
Como le majoritate de vos probabilemente sape, io ha personalmente un
typo relativemente legier de iste handicap neurologic, le qual typo
se appella etiam le syndrome de Asperger. Io ha experientia anterior
de facer discursos in conferentias super mi experientias e ideas con
isto, normalmente in nederlandese e anglese.
Sed le publico del conferentia actual non comprende universalmente le
anglese. Alcun menses retro io incontrava (durante le conferentia
Autscape in Anglaterra) un del organisatores del conferentia actual,
e quando io parlava interlingua in voce con ille, ille me comprendeva
perfectemente. Como resultato, a fin de eliminar le necessitate de
traducer, io ha le permission e le incoragiamento del organisatores a
pronunciar mi discurso integremente in interlingua.
(Solmente le questiones del audientia debera esser traducite, post
que io comprende nihil del portugese parlate! Le pronunciation es
troppo rapide e troppo differente.)
Mi amica Kalen, qui es canadiana sed habita in Anglaterra, facera un
altere discurso in anglese, viste que illa non sape (ancora!) parlar
interlingua activemente; ma io traducera su diapositivas electronic
PowerPoint in interlingua pro render los bilingue.
Qui sape si isto ha essite facite anteriormente: un discurso in
interlingua a un conferentia que ha nihil a facer con interlingua e
cuje participantes non es familiar con illo?
In omne caso, le experimento essera interessante, e io vos tenera al
currente del resultato.
- Martijn
* APPDA = Associação Portuguesa para as Perturbações do
Desenvolvimento e Autismo = Association Portugese pro le Disordines
de Disveloppamento e Autismo. Norte=Nord. http://appda-norte.org.pt/
e http://autismo-norte.blogspot.com/
--
Archivos e disabonar: http://listserv.icors.org/archives/INTERLNG.html
|
|
|