At 15:17 +0200 16-08-2008, Jan Årmann wrote:
>Iste message per Martijn esseva in mi opinon multo importante e pote anque
>esser un base pro discussiones super le plus importante questiones re nostre
>interlingua.
De accordo que un tal discussion es multo necessari. Io non sape si
mi message esseva de alcun importantia special, viste que le tono e
motivation proveniva de mi frustration profunde. Forsan un expression
de frustration profunde es lo que se necessitava... le futuro lo
monstrara. Pro le momento io pensava simplemente que nihil que io
pote facer poterea pejorar le situation ancora plus.
> Exemplos:
>
> - Que es le objectivo de interlingua? Facer lo un linga naturalmente
> acceptate in competion que altere linguas mundial in nostre
>cultura general?
> - Qual es le objectivos subordinate?
> - Como debe nos interlinguistas organisar le labor?
> - Es nostre presente organisationes stabile e apte pro le labor e le
> gestion?
>
>Tal questiones debe esser tractate e respondite.
Istes realmente es excellente questiones, e io te regratia pro poner
los. Io va ben considerar los e inviar mi pensamentos plus tarde, e
io spera que multe altere personas va facer lo mesme!
>Ubi? - Iste foro
>evidentemente non es apte pro tal discussiones. Nunc illo plus sembla un
>scena ubi le sport es a discuter le lingua per se e non su futuro. Le
>veteranos plus erudite manca.
Proque es isto un impedimento? Certo tal discussiones non deberea
limitar se al veteranos. Un discussion inter segmentos plus ample del
parlantes de interlingua me sembla necessari. Io pensa que il esserea
un excellente cosa, si se discuterea le futuro de interlingua inter
participantes toto normal, in alcun foro como iste. Mi sperantia es
que un tal discussion poterea de facto revivificar le lingua inter le
participantes in internet.
>Interlng me non plus place. Illo in plus es
>troppo primitive technicalmente. Le foro desirabile debe permitter
>attachamentos como p. ex.illustrationes.
Ma Janne, tu ha dicite isto ja mille vices, e nos ja lo sape! Le
facto es que non multos te ha supportate in isto. Personalmente io
pensa que le litteras A-Z, plus alcun signos de punctuation, suffice
multo ben pro poter discuter qualcunque cosa in interlingua. A me, le
manco de omne distraction rende un foro multo plus confortabile.
Le messages in texto simple lassa etiam al recipientes le controlo
super como monstrar los in lor schermos individual. Non tote le
personas es identic. Un persona con mal oculos, per exemplo, pote
facer visualisar se tote le messages in un mesme typo, color e
grandor de litteras de su preferentia, optimal e confortabile a ille
personalmente, sin esser lassate al mercede del preferentias del
autor. Mi opinion es que le controlo super como se monstra le
messages de un lista de discussion per e-mail pertine propriemente al
recipientes, non al autores.
Si un illustration es de facto necessari, nihil te impedi de cargar
lo in alcun sito web e inserer postea le adresse URL correspondente
in un message que tu invia al lista. Tu pote usar tu proprie sito
web, o cercar "free image hosting" in Google pro seliger inter un
massa de alternativas.
Como dicite antea, io esserea ben preste a cambiar le configuration
del lista pro permitter le inclusion de diverse typos, colores e
grandores de litteras si existe inter le membros un appoio plus que
trivial a favor de iste cambiamento, ma (ultra te) necuno me jammais
lo ha demandate. Le repetitiones del mesme criticas, veniente sempre
del mesme singule persona, non servi de facto a convincer me. Alora,
si altere personas de facto es de accordo con Janne: scribe nunc pro
appoiar su proposition!
Amicalmente,
- Martijn
--
Archivos e disabonar: http://listserv.icors.org/archives/INTERLNG.html
|