Carissime amicas e amicos!
Le 19 del mense currente, Prof. Ingvar Stenström, un del major patrimonios del movimento pro Interlingua, postava sur iste Lista de Discussiones un message super le nove sitos
http://www.myspace.com/interlingua_ial
http://groups.myspace.com/interlingua
Io ha jam visitate iste sitos alicun vices e io pote dicer vos lo que seque:
. Io considera como un evento multo importante le creation de un tal spatio pro Interlingua de I.A.L.A. in le interrete.
. Multe cosas me place inter illos que io ha ibi vidite. Primo: Interlingua de I.A.L.A. es portraitate como un femina, 56 annos de etate, nascite in New York, N.Y., SUA, "cuje interesses hic es le promotion del Lingua Auxiliar International - INTERLINGUA sur le internet, relevante su practic utilitate como un porta que conduce al comprension de multe linguas europee; su extraordinari potential como un lingua auxiliar al internet; e incoragiante un crescente numero de parlatores in linea" (io traduce ab le anglese). Vos ben sape que io lamenta le absentia del feminas in nostre *communitate*, e inter le amicos / amicas del nove sitos io ha trovate al minus tres feminas (Shae, Evgenia e Diane), lo que me pare jam un bon signal de que Interlingua pote de facto interessar le belle sexo.
De plus, io non pote non mentionar le videos ubi nostre amico e eminente interlinguista ALBERTO MARDEGAN lege, clar e correctemente, un lettera (per Stefano Pellegrini) cuje contento interessa a tote interlinguistas (Mardy ha traducite in Interlingua le original italian) - isto es le prime video; in le secunde, ille parla liberemente essayante incoragiar alteres a producer simile videos.
Ben, amicas e amicos, io crede que isto es sufficiente pro demonstrar vos que un nove spatio, moderne e generose, es offerite al practica e divulgation de nostre *oblidate* lingua auxiliar international.
Cordialmente,
Carlos Alberto
--
Archivos e disabonar: http://listserv.icors.org/archives/INTERLNG.html
|